موال الجرح العربى المزمن
💔(الجرح العربى المزمن)💔
ياجرح مزمن شديد الإلتهاب
غزك فى قلبى زي عض الكلاب
لا لك دوا فى الغرب يشفيك
ولا طبيب فى الشرق يداويك
وحبل الأمل من يأسه داب
💔💔💔
ياجرح مزمن بقاله تسعين سنه
مش هانسى أرضى ولاهانسى مين انا
فى جسمى قَطّع مُوتى بيحيينى
القدس قدسى ودمى فلسطينى
دمعى الحزين بقى عندى زى الغُنا
***
ياجرح مزمن من بدايته خسيس
وارث أصول الشر من كتب إبليس
فى قلوب شعوب العرب زرعت نار وسواد
لكن يعيش البطل وينتهى الجلاد
ولكل معركه فى ميدانها عريس
🐴🐴🐴
ياجرح انا ع الحق وانتا على الباطل
وف كل مؤتمراتك بتمط وتماطل
وعدتنى اننا رح نعيش فى سلام
عيشتنا على حلم كله كان أوهام
رافع شعار السلام وقلبك حقود قاتل
🔪🔪🔪
ياجرح زارع فى قلوبنا شجاعه
حب الشهاده عندنا زى الرضاعه
ومهما طال الظلم حتما هننتصر
سيف الإيمان والبطوله عمره مابينكسر
الارض راجعه لصاحبهاولكل غاصب ساعه
💀💀💀
ياجرح مزمن فى جنبنا مزروع
باحاربك بالحجر تحاربنى بالدروع
فين الضمير ياعالم والرحمه والمساواه
ازاى دى تبأه عداله وازاى دى تبأه حياه
الظلم فارد دراعه والحق مش مسموع
💪💪💪
ياجرح فى الظلم مالك ضمير ولاحد
صواريخك مطر عاشقه الخراب والهد
قتلت صاحبى واخويا وهدمت بيت جارى
بكيت من حسرتى ومن لهيب نارى
ولابد هاخد بتارهم منك بأقسى رد
🤺🤺🤺
ياجرح فاكر عُمر فاكر صلاح الدين
عُمر اللى فتح القدس وصلاح قائد حطين
رجال عظيمه صدقو فى حبهم لله
حبو الشهاده زى حبك للحياه
رجال لما بتصدق بتمحى المعتدين
🤝🤝🤝
ياجرح معاك سلاح حاجه ولا فى الخيال
واحنا معانا الإيمان يقدر يهد جبال
واقف معاك أقوى دول فى العالم
وانا واقف معايا ربى القوى العالم
واللى بنيته باطل بوكرا عليك يتهال
☝️☝️☝️
ياجرح مزمن أنا بوكرا هابأه جرحك
ونسايم انتصارى هتطفى شموع فرحك
اخرتك قربت واحنا من زمان عارفين
مكتوبلنا الإنتصار فى القرآن المبين
إفرح وعيشلك يومين الوقت من صالحك
***
موال
شاعر الإحساس
(رضا عبد الحميد )
ليست هناك تعليقات:
إرسال تعليق