قصيدة محكية بعنوان {{لَمّْا ياحلو}} بقلم الشاعر السوري القدير الاستاذ {{جمال خضور}}

قطفةشعر.. من (زورق الليل) 

لَمّْا ياحلو.. فَلَّيتْ.. 

جَفاني النومْ.. 

وصارْ السَّهْرْ.. 

لَ عيوني رْفِيقْ..

غْصونْ القلبْ دِبْلِتْ.. 

ولاحبرْ بعيونْ.. 

وراقْ صَفْرَا..

ومْنينْ جيبْ وراقْ.. 

إكْتِبْ.. 

وراقْي الخَضْرا.. 

راحِتْ بالحَريقْ.. 

ضاعِتْ لمْفارقْ بالمَدىٰ..

لاصوتْ إسْمَعْ.. لاصَدَىٰ.. 

وغرْقِتْ بْخَطْواتَكْ.. 

هالطَّريقْ..

فتافيتْ السْكَْرْ.. 

عَلْقَمْ.. 

ماعادْ حلْيانة.. 

حروفْ الهوىٰ.. 

آهاتْ.. 

منْ الزَّعَلْ..سكْرانة..

شو بقي منْ العمرْ.. 

بِجْرارْ السَّفَرْ.. 

ياخَمرة الروحْ.. 

وجروحْ تْواسي جروحْ.. 

ياصوتْ اتْخَرسَنْ.. 

ومَبْحوحْ.. 

شوبشْعا هالعتْمة.. 

لوضاعْ القمرْليلة..

شَحِّتْ قناديلْ .. 

وانْطَفِتْ نجْماتْ.. 

وياريتْ حَبّةْ زيتْ.. 

منْ القَلبْ تنْعِصٍرْ.. 

ياريتْ.. 

تَ يضْوي هالقَنديلْ.. 

وفْرَاشاتْ العشقْ.. 

ترْقُصْ بهالليلْ.. 

شو قَولَكْ ياحلو.. 

ترْجَعْ الأيامْ.. 

وينامْ الهَوىٰ بْعرزالْ.. 

شوقَولَكْ ياضنىٰ الروحْ.. 

ياحلو.. يارْفِيقْ.. 

      سوريا/ جمال خضور 

     ٢٥/١١/٢٠١٩