(هاي الاحزاب شفصلت )
1)
اذيول تتهم بذيول
والساحة لعب شبلول
ضربه الك ضربه الي
يوميه طالعلي ولي
يوميه طالعي وصي
كامشلي عصت كلكلي
جايبلي موسى الاشعري
ناشط يصير بهلزمن
هاي الاحزاب اشفصلت
رايد وطن ...اي رايد وطن
استاو لو نص استاو
اشتغلونه بس بوگك ونهب
من تعترض جاك التاو
ذيول يگولو اعلينه !!
رايد وطن .. اي رايد وطن
2)
بلي يبلبول بلي
باعتنه الذيول بلي
ماكلين خيرات البلد
والشعب مذلول
لو طالب بهذا الوطن
كالوله مخبول
حصة الك حصة الي
ماكو ملاعيب ولحن
بس المصايب والمحن
والارملة بنوح وشجن
والشايب بشيبة امتحن
والشاب عمرهه مرتهن
بشلة حرامية نجس
هاي الاحزاب اشفصلت
رايد وطن ...اي رايد وطن
استاو لو نص استاو
من تعترض جاك التاو
ذيول يگولو اعلينه
3)
شرطة وحراميه اللعب
والساحه صاير هلشعب
مسؤول فايز بالنگر
ایبوگنه من کل کتر
بس صعد شيدله قصر
واحنه ابعصاته ننشمر
والقاضي يحكم علفگر
يهدمله بيته
هاي الاحزاب شفصلت
رايد وطن .... اي رايد وطن
استاو لو نص استاو
شتغلونه بس بوگك ونهب
ومن تعترض جاك التاو
ذيول يگولو اعلينه
17/ 12/2019
حمزة صوفي القيسي / العراق
...............
التراث الشعبي العراقي
الكلكلي والشبلول : عصا صغيرة بطول 15 سم تضرب بعصا اطول بيد الاعب ليبعدها الى ابعد مسافة فيقوم الفريق الثاني ارجاعها لخط البداية يصيح بنفس واحد شبلووووول واذا انقطع نفسه خسر
وشرطة وحرامية : ايضا لعبه شعبية تراثية
وبلي يبلبول بلي ماشفت العصفور بلي ينكر بالطاسه بلي ...الخ : ايضا اغنيه من التراث
التاو : صاروخ موجه باليد بواسطة سلك لتدمير الدروع والتجمعات البشرية المحصنه
ليست هناك تعليقات:
إرسال تعليق