بمناسبة انتصار العاشر من رمضان عام ١٩٧٣
رباعيات
(رباعيات الجندي المصري)
الله أكبر الله أكبر بتهد الجبال
وتعمل في قلوب العدا زلزال
الله أكبر رفعتني على بارليف
وانا شايل على كتفي مدفع الميم دال
✌✌✌
النصر من الله بَعد العُده والتخطيط
النصر مش فَهلوه ولاحظ ولا طنطيط
اللي عليكي يامصر يجرأ ويتعدي
من الآخر غبى وغشيم وعبيط
✌✌✌
خير جنود الأرض بحديث الرسول
إحذر تقَرب يامعتدى م الغول
المصرى عشان مصر عاشق خروج الروح
ولسه تراب سينا بدمنا مبلول
✌✌✌
فضلت مخدوع بتقول مافيش قدك
وانك لاتقهر ولا نقدر على صَدك
أنا جُند مصر ماحد يكسرني
وان كنت ناسي التاريخ أسأل أوام جِدك
✌✌✌
أكتوبر المجيد عايش في القلوب ذكرى
وخِطته في الكتب باقيّه للجيوش فِكره
عمرك ماتهزمنى إلا إذا
فات الجمل من فتحة الإبره
✌✌✌
لا تقولى تانى بارليف ولا تقولي شارون
اصحى وفوق م الوهم إحذرني يامجنون
إعمل لغضبي وردعى ألف حساب وحساب
أنا مصري أنا مختلف عن كل جُند الكون
✌✌✌
أنا حبي لمصر جوه الدماء ثابت
لأني من نيلها وطينها من الجذور نابت
باحفر لكل عدو تحت القدم قبره
لا عمرى سِبت مصر ولا هيّا كمان سابت
✌✌✌
أنا جند مصر معروف بجبـروتي
وعشان ترابها يرخص لها مـوتي
أنا اللى ساعة الحروب فوق ماتتصور
وانا إللى ساعة السكوت بَرّبِى لك حُوتى
✌✌✌
في البر والجو والبحر ليَا أسود وأسود
في الصمود والتحدى مالى مثيل موجود
ببأه بحور من لهب ببأه جحيم ورعود
على كل من يِعتِدى أو يوم يمس الحدود
✌✌✌
أكتوبر المجيد نصر هز الوجود
وشرف لجيشنا طول الزمان ممدود
ومهما قلنا لجيشنا مانوفيش
وكلامنا هيبأه فى الإنتصار محدود
✌✌✌
أنا جُند مصر اللى أهلها فى رباط
مسلمين فى محبه عايشين مع الأقباط
لا فتنه ولا إرهاب فينا هيأثر
مصر بحفظ الله أمنها متحاط
🌙+ 🌙+
رباعيات
شاعرالإحساس
رضاعبدالحميد
ليست هناك تعليقات:
إرسال تعليق