مجرد حلم
(مجرد حلم)
انا اصلى مانيش تقليد
وا حب ا عيش فى سعاده
واشوف الكل سعيد
وباحب الخير للناس
وبعامل كل الخلق
بالصدق وبالإحساس
طول عمرى احب الجد
ولا حبش اجامل حد
ولا احب اخدع
وان قلت كلام عمرى مابارجع
ولحال الناس باتوجّع
وباقول الحق ماخافش
لوفيّا الناس هتقطع
وباعادى الزور والباطل
انا دوغرى ماحبش اماطل
وباحب الكون وجماله
سبحان من أبدع صورته
نظمله نهاره وليله
وجعل من قمره هلاله
وباحب الصحرا الفاضيه
وباحب سهوله وجباله
وباحب الشمس بنورها
وبحاره مع محيطاطه
وجناينه وكمان وغاباته
داللى مايشكرش المولى
زيه زى اللى ماتو
واتمنى اشوف الدنيا
من غير ولانقطة دم
ولاشوف بعنَيّا سلاح
ولا دمع وآه وجراح
ولا اشوف اطفال ايتام
ولا اشوف ابدا انسان
بيآسى من الحرمان
ولااشوف ولا حد جعان
والكل يحب الكل
والشوك يتحول فل
والنار تتحول ضل
كلنا عايزين تغيير
والكل يعيش بضمير
الشر ياناس مش دايم
الدايم هوه الخير
اللى بنصنعبه سلاح
نزرعبه احسن تفاح
ولاحد يكون فى الدنيا
عايش كده مش مرتاح
ليه بس بإيدنا ندمر
تعالو نزرع ونعمر
اللون الأخضر احلى
بكتير م اللون الأسمر
الحرب ياناس م الفتنه
والفتنه من الشيطان
ابليس قصده يموتنا
ومعاه ندخل فى نيران
ياللى بإيدكو الأمر
ياللى بإيدكو القرار
السلم حصاده التمر
والحرب حصادها مرار
(حلم)
شاعر الإحساس
(رضا عبد الحميد)
ليست هناك تعليقات:
إرسال تعليق