الوضع مش ظابط
يا خي الوضع أبداً
مش ظابط
مستوى الأخلاق
للأرض هابط
والدولار سعرو أبداً
مش ثابت
طالع بطلوع
لا بهمو الجوع
ولا صرخة طفل
للرضعة ناطر
الحليب مقطوع
وتتجادل ممنوع
إذا كان ولا بد
لازم تقاتل
وعبواب الدكاكين
من الصبح يا مسكين
تتأمّن الزيت
أو يمكن البيض
و شوية ضروريات
للبيت
ودّع أهلك لإنك
حتخاطر
بكل المصاري ال بالجيبي
وحتصيبك الخيبي
وترجع حامل كيس
أو علبة
مش حلويات
ولا لعبة
وراسك يوجعك
وعالخصلة شيبة
وتقول يمكن
من العين صيبي
وتخجل لإن بوعدك
ما وفيت
واضطريت ترجع
عالبيت
بلا طبخة ولا فرخة
ولا لحمة ولا خوخة
كإنك واحد بخيل
وشاعر إنك ذليل
ما في شي بقي ظابط
بس قلبك بعدو نابض
قولك بكرا في تغيير
أو بعدنا مطولين كتير
حتى الجندي متل الظابط
معاشو لا مكفّي ولا ظابط
عفواً يا إبني
لا فيني سفرك لبعيد
ولا فرحك بثوب جديد
ولا بشْرك إنّو
بعد الصوم عيد
متلي متلك حيراني
وعلى الوطن غيراني
بس شوفة عينك
ما في شي بلبنان ظابط
فاطمة البلطجي
لبنان /صيدا
ليست هناك تعليقات:
إرسال تعليق