*** مين سامع ***
أنا باصرخ ومين سامع
مافيش واحد ياناس مرتاح
بنظلم بعض في الجامع
ونحسد فى اللي مات وارتاح
وحتى الموتة محسوبة
تلاقي الدفنة بصعوبة
محدش فاكر التوبة
ومين باقي فى قلبه سماح
بنحسد فى اللي مات وارتاح
يا دنيا وقاسية على الغلبان
وخوف طالع فى كل مكان
بنهرب في بلاوينا
نغمي قلوبنا وعنينا
ونصنع دوخة بايدينا
وفين الرحمة يا إنسان
ضمير الناس عمل مرتاح
ومين باقي فى قلبه سماح
مرار اللقمة والمصاريف
وعيشة ماشية بالتخطيف
زمن بينادي عصياني
وحيرة جوه كتماني
دموع تعصر فى أحزاني
زمن قاسي وشكله مخيف
بنبكي حتي فى الأفراح
مافيش واحد ياناس مرتاح
وأوعى تقول قدر ونصيب
تمص لمونة فى التصعيب
هوان بهوان نعيشها جنان
ونخلق سكة للغلبان
تموت واقف تموت كسبان
تموت فى الغربة ولاقريب
خطاوي والزمن سواح
بنحسد فى إللي مات وارتاح
بقلمي الشاعرناصرعطامحمد
البلد مصر
ليست هناك تعليقات:
إرسال تعليق