عنوان القصيد ( وصية والد)
بقلم حاتم بن حورية تونس ولاية نابل معتمدية حمام الغزاز
يا وليدي جيب كراسك و هات الأقلام
وإكتب نصايحي و الرب علام
طيع والديك و إسمع النصايح
و برهم في كبرهم عند المجايح
و لا تتأفف منهم يوم المطايح
تربح رضايتهم و هكا وصى الإسلام
و على خواتك نزيد نوصيك
هوما السند كيف الدنيا تخلي بيك
و هوما جوانحك إلي تعليك
و أرشم و قيد هذا في زمام
و باريك من كل عايق والديه
و الواطي من بالك نحيه
و تبع إلي قدرك شاريه
و كون في حواز أصلك حوام
و في زواجك إختار عرصة البلاد
و إختارها بنت ناس أجواد
قرد موالف ولا غزال شراد
وخوذها بنت أمجاد عز الأقوام
و صلاتك ما تكون تاركها
بيها تفهم مسارب الدنيا و مسالكها
و تقد صعب الأيام و معاركها
و هي سيرتك على طول الدوام
كون في طبعك متسامح
و أرفع رايتك عند الملامح
مثل الصقر صامي كاسر جارح
و إسرج جوادك بالحق لجام
يا وليدي
يا وليدي بدل القلم حبارو يتقاطر
و شد وسط الكراس راهو تشاطر
و مازالت حروفي تتناثر
و مازال الحديث و الكلام
باريك من مال اليتيم
و باريك من دمعة المظلوم
و رد بالك تكون زكيم
و تخلي روحك محروم
و رد بالك تكون رخيص
و تخلي روحك في الخصاصة
و طيش كل من هو خسيس
و إبعد على كل من فيه نجاسة
و كون الفوق عتيل السمعة
مثيل شهاب في السماء ساطع
في كل مكان مخلف لمعة
مثيل السيف المصقول قاطع
رد بالك تقطع الرحم و الصيلة
و على أصلك راك مسؤول
باريك من الخبث و الحيلة
و خلي شملكم ديما مجمول
يااا وليدي الحبار شاح طيش القلم
و الكراس صفحاتو جفت
أرجع راجع ونصيحتي خلاها رشم
و إمشي بيها من غير ما تتلفت
بقلم حاتم بن حورية ########
ليست هناك تعليقات:
إرسال تعليق