بالعامية المصرية
____
حدوتة جنوبية
---------------
لسه في عيني
غيرة وغزل
لسه فى عيني
بصة عيني
المليانة شوق
مليانة قلق
عيني الشايفة
أبعد م الشوف
وقليبي مرعوش
خايف م الخوف
ليه الدم سايل؟
باعت أنينه رسايل
ع الأرض وقايل
القمر مدبوح ياهوه
مين شايف ؟؟
ومين مش شايف؟!
الناس واقفة طوابير
وبياعين فى العيد
طراطير طراطير
وحمامي يامه بيطير
حاطط على شوك
نفسه ف لحظة شوق
نازل البير
طراطير طراطير
الناس واقفه طراطير
أسف جداً
الناس واقفة طوابير
حاسبوا الدبابير !!
على بيتنا الاخضراني
....بيطير ..!!!
الدبور مليونير
ومفيش ف البيت...
غير الفتافيت ..
قوت العصافير
والعصافير
خافت هجت
هدوا العش
المبنى من قش
طمعوا ف قليبي الصغنتوت
بصيت حواليً
لقيت ابويا..
ماسك ارغول
..غنيلي يابا .....
كان نفسه يقول
غنا العصافير
لما كنا صغيرين!!
..غني يابا
شايف دموع
سارحة ع الخدين
ليه يابا ؟؟!!
قالي إن كنت فاكر غني
وبيوتنا حاضنة بعضيها
قبور توابيت
ملهاش شبابيك
ع الشارع..الحزن فارع
باكية ليالي الصيف
شفت ع الرصيف....
عيال العوزة.
وأنتظار الرغيف
المهروس مواجع
وأبريق ناشف الريق
وليل مخاصم نهار
وأيام ليها ضروس
تطحن المولود
وعضم الفقرا
قرابين للألهة
وسط الزحام
وهياكل بترمح
وعيون بتصرخ
ووشوش العيال
مرسومة تجاعيد
وعنكبوت مفرود
ع الحيطان والبيوت
خانق الحيطان
والغريبة بيسألونى
ع العيد فاضل كام ؟
بصيت ضحكت!!
بكيت
قلت....
ياريت ياجينا
في يوم
إحنا في انتظار
بقلمي
حمدي البوقي
ليست هناك تعليقات:
إرسال تعليق