بمناسبة عيد الثورة إليكم هذا القصيد الذي كتبته في 2011
عدّيت المر
عدّيت من مر السنين أيّام
و عدّيت من مر ليّام سوايع
و عدّيت من مر الحياه أحكام
و عانيت من حكم لحكام وجايع
علاش يا زمان صرت معكوس
يعيش فيك الواطي مرفوع
ترفعهم فوڨ عرشك جلوس
فارغين التدبير بلاش نفوع
فيك حكموا بتحريك الرّوس
و حكمهم جاير لا فيه رجوع
بلا شفڨة بالوجع ملموس
يخلّيك تتغزّل تنادي مصروع
كان السبّة والوجه عبوس
ولسان الحق بالرّيڨ مبلوع
تعدّي ليلك ساهر بكابوس
بتهمة جديدة تتوجّع ملكوع
و حبسك مسطّر و مدروس
بمكر ضبوعة تحكم فيه لفوع
نتساءل ثمّاشي قاموس
يعدّل و يرسم فيكم ردايع
ويبصم في الڨلب دروس
و يكفكف عيون دمايع
و يكفكف عيون دمايع
شبابك عايم شاڨڨ لبحار
يتشفّع منّك هارب هروب
متليّع من الهم و الدمّار
عايش من حقّه مسلوب
بحكم بايد يحرڨ بالنّار
من حق الحياه منهوب
شعبك ڨلبو فد وانهار
لين فاڨ و بدّل الاسلوب
فيهم من تعدّى لخطار
و إلي روّح بالموج مڨلوب
ڨدّاش من أم ڨلبها ثار
و ڤدّاش من خد مندوب
و ڨدّاش من والد ڨلبه هدّار
عينه دمّاعة بفراڨ المحبوب
شي نشوفوه جهار بهار
و صار خبره باين شايع
ڨدّاش حكات عليه أخبار
و ڨدّاش ذڨنا منّه لكايع
وڨدّاش ذڨنا منّه لكايع
كيفاش يا زمان نعيش؟
و بلادي خيرها ماشي للغير
نحب نتعلّى و نربّي الرّيش
نزاحم الرّوم مع الصّڨور نطير
نولّي جارح ما نهضم حشيش
ولا نهاب كل من هو خطير
خلّيتني ناكل الكسرة بتبربيش
و خيرنا ماشي بالضّخ للتصدير
و في وكري عايش بالتفتيش
نلڨاشي إبرة في الكوم بالتّحكير
صرت هايم نلڨاشي درويش
يڨرى ملامحي ينحّيلي التخدير
نا طالب حقّي و نحب نعيش
بربّي عبّرني و سهّلي التأشير
شمسي في وكري ما تضوّيش
نتجسّس في ظلامي ضايع
مضيّع طريڨي ما ندريش
و البر واسع وما لڨيت بقايع
هات ڨلّي زعمة شنوّة الحل
في بلاد نعيش فيها مرهوف
مثيل مجنون لا يعڨل لا يدل
هايم سارح يشعر بالخوف
زعمة يجي نهار و نلڨى بدل
و نفرح بتعبي يصير مخلوف
و يزّي ما حطّوا عليّا سدل
و يزّي ما تهنت و كليت كفوف
و يزّي ما تكسّرت عليّا ڨلل
بربّي يا زمان حن عليّا و روف
نحيا في بلادي مثيل بطل
و طريڨي ڨدّامي يولّي مكشوف
و كل صعيب بالڨدرة نوصل
و ما نهد في لحمة حلّوف
بربي يا زمان خفف الحمل
وما تخلّيني في وكري صايع
نحب ننعم في بلادي و نهل
راني نعشڨها و دم العشّاڨ ديما فايع
راني نعشڨها و دم العشّاڨ ديما فايع
بقلم حاتم بن حورية
في 2011/12/1
ليست هناك تعليقات:
إرسال تعليق