((ومين حاسس بمين))
يوم ماقلت إني حبيبك
وساكن جوا نن عين
كان ساعتها الكذب باين
وكنت حانث فى اليمين
والدليل غدرت بيا
بعد طول عشرة سنين
بس حاجة تكون عارفها
كل دا سلف ودين
ذنبه ايه قلبي اللي حبك
للمشاعر ليه تهين
فى خطاك أنا كنت سايرة
ليه بتنصبلي الكمين
قولي ايه هيا المخالفة
خط سيري كان يمين
بس عيبي إني عشقتك
قبل مااعرف أنت مين
والسؤال ماحرمش ابدا
خلقك أنت اي طين
بس كل الذنب ذنبي
عشان عشقت فى لمح عين
والنتيجة الحرقة صعبة
بس مين حاسس بمين
واللي يحكي ع المشاعر
قوله كذاب الحنين
أصل لو صادقة المشاعر
كانوا حسوا بأهل غزة وجنين
كلماتي
نور الدين محمد (نبيل)
١٤/٩/٢٠٢٥
ليست هناك تعليقات:
إرسال تعليق