صلاة الفجر
بقلم ماجدة البهيدي
****************
في راحة لما أصلي الفجر بتأثرني
تخلي الهم والأحزان تغيب عني
تنسيني الأهات والويل
والقي القلب بيغني
وبستناها طول الليل
ومين ع الحب ده يعني
في لذة شوق كده زيادة
وما أحلاها دي عبادة
صدق من قال في يوم لبلال
أرحنا بها ك العادة
انا لما بحن أو أتغرب
أجري عليه بسرعة وبتقرب
والقيه م قبلني بكل حنان
لو مش هتصدق روح جرب
دي حاجات تتحس م تتقلشي
وأنا أقولها إزاي أنا معرفشي
علشان إحساسي وانا ف قربه
دانا اروح لو ع الشوك أنا همشي
أول ما يأذن أنا ما أدري
ده سبقني القلب أهو من بدري
واتوضا وقاعد متحضر
مشتاق ف بحور النور يجري
وبحس ساعتها الدنيا براح
وكأن القلب طلع له جناح
بيرفرف وطاير بيا لفوق
وانا عايشة في حالة من الافراح
وأفضل ساجدة أنا ليل ونهار
وأتدرع وأقول في الأذكار
وأسبح بأسمائه الحسنى
و تملأ البركة علينا الدار
ربي يدمها نعمة عليا
وأفضل طول أيامي الجاية
في عبادة وقرب وصلاة وخشوع
إلى أن توافيني المنية
وأجعلني راضية ومرضية
واشملني بنظرة حنية
عشمانة أموت وأنا ساجدة إليك
اكتبها يارب بقى عليا
الأربعاء 17/4/2024
#ماجدة_البهيدي
ليست هناك تعليقات:
إرسال تعليق