( ؛ ؛ ؛ بشوف الناس ؛ ؛ ؛ )
بشوف الناس
وفى عنيها كلام منشال
واحس الحُزن فى قلوبها
جبال وتلال
وسامع لأه بتنادي
وألف سُؤال
وحاسُّه الكِبر
مش راضي يبوح بالحال
وحالُه يبكي من حالُه
ويبكي الذُل بالموال
ماهو مصدق كلام يتقال
ولو قالوا على الغُربال
يشيل الميّه
والإبره تعدي جِمال
طب كبّر وقولُه حيتان
راح تسمع يقول أُمّال
إسم الله على الإعلام
ما الكُفته بقت أمصال
وبتسأل ياواد إزاي
مدُقش دا ماشي الحال
دا أخرنا كدا مُرستان
هنعدي كمان الصعب
من صوتنا يخاف الرعد
هنعدي على الأطلال
وبطبله وكام مُزمار
يتحول خرابها عمار
وبتسأل ياواد إزاي
متأآمن دي قاعدة شاي
واحلفلك بكام حلفان
ما هضُرك بشئ بطّال
وغريبه على الشُبان
سلسلتُه كمان ولبان
أيه دورُه فى دا التوهان
إتحرك يا ادي الإنسان
أُرفُض يلّا
وعلّي سكوتك
خايف منُه
والله دا صوتك
ألا تقولي شوف لبنان
شوف إنجازنا
زي النِجم بأعلى مدار
زي الشمس فى عز نهار
حتى مصيرنا
برضوا ونيلنا
عابر بيه وِسط الغربان
بس يا اخويه
بيكفي جِنان
قُلت أخرنا دا مُرستان
برضوا يقاوح
حفظُه بيان زي الجُرنان
نفسي يا ربي شوية صبر
ألا العقل إديك والقبر
عُمر ما يشفع
عُمر ما ينفع
أي كلام مع فكر اختل
حتى حروفنا تعمل أيه
فى طريق انسد
زي النهضه
بتاعت السد زي حجرنا
بس حجرنا مره فى سينا
لان وانشق
واحنا مِخاخنا وزرعة خوفنا
عايزه مُبيد أو عايزه الحصد
........ .... ... .. .
أحمد الصاوي مصر ٥ / ٨ / ٢٠٢٠
