حدوتة بثينة و القمر
وبقيت عجوز
و الشعر الابيض
بعد ما كان مستخبّي
طِلع .. ظهر
كركوب .. .. و محني الضهر
من تقل الهموم
و أنت بتعافر
و بتحاول ..
تشد عمودك الفقري
اللي سوس و اتنخر
انسى الشباب بقى
و المراهقة والطفولة
و افتكر ..
إنك بشر
و البشر من طين
و أصل الطين ضعيف
و البشر فخار
بكل سهولة ممكن يتكسر
الشِيب وصل !
مستني إيه ؟
يومين و ترجع تاني
تتعكز .. و تحبي
تلقاك بتتهجّى الكلام
تقع الحروف منك
تتوه ..
و عنيك من الشيبة تدوخ
و إيديك من الرعشة
تلخبط كل شيء
سمعك تِقل
نظرك ضِعف
بس أكيد الكلمة دي
ها تسمعها دايما
كلمة ( زهايمر )
لما تتوه
و أنت في بيتك
جوه أوضتك
بين ولادك
وسط أهلك
و تلاقي حُرقة
جوه قلبك
و سؤال بيتخانق معاك
و في النهاية بيهزمك !
الناس دي مين ؟!
تلقى الجواب
في دموع حفيدتك
بتقول يا جدو
احنا حبايبك
انت نسيتنا ؟!
ده أنت لسه حاكيلي
حدوته بثينة و القمر !
تبقى مين هي بثينة ؟!
يعني إيه كلمة قمر ؟!
الزهايمر في الدماغ
شغال بيمسح كل شيء
من غير ما حتى
يسيب أثر
و انت في نهاية المطاف
أيام تقيلة
شِداد عِجاف
بس أحسن حاجة فيها
إنك رجعت من السفر
أبيض ..
بياض بيشع نور
مش بس شعرك
قلبك .. ملامحك
روحك .. جوارحك
و انت قاعد زي عادتك
بتهز راسك
لا بتحسب العمر اللي فات
و لا حتى في العمر اللي باقي
ولا عاد يهمك ذكريات
قاعد بتستنى بشوق
لحظة ما تتبخر
و تتحوّل إلى نقطة مطر
تأليف / متولي محمد متولي بصل
ليست هناك تعليقات:
إرسال تعليق