( ؛ ؛ ؛ ليه يا وطنّه ؛ ؛ ؛ )
ليه يا وطنّه نعرفك
سلك وحواجز أو عجايز
فوق كراسي مسّوِسه
حطه القيود
ليه لو ذكرنا فكرتك
يصحوا اللي ماتوا من جحود
وينادوا فينا إزرعوا
بذرة أمل فيه الصمود
ليه فكرتك زي الطريق
يمشي فينا وعُمرُه
فكر يوم يعود
ليه بتجمعنا الحروف
وتخُط دايماً حرفها
زي النجوم فى بحر ليل
منتوهش فيه وتتلغي كل الحدود
ليه يا طريقنا
تتفرش ليه بالدموع
والمواجع والعنت حتى الصدوع
ليه لما نحلم
يتقتل فينا الجنين
يمكن سفاح أو استحاله يكون وليد
أو كفاح لزملُّه
صَهر ومن جديد
زي الحديد مينصهر عشان يفيد
ليه يا وطنّه نعرفك
بليل طويل بفجر
دايماً فيك طريد
ليه نعرفك إنك وحيد
وغريبه يااخي انك وحيد
بص بعيونك لِأُمّه
ما فيها شئ إلا وحيد
زي أُم استنظرت أورطة عيال
جالها يا خساره صديد
ياريتُه شئ عضوي يطيب
مستعصي دايماً
ع الطبيب
كل واحد مِنُّهُم
يكبر يقدس رمزُهُم
تحيا العَلَمْ حلو النشيد
ولو سألتُه فكرتك
يطلع بليد أو حتى
عن فكرُه بعيد
أو حتى مش عايز يعيد
أو حتى مش عايز يشيد
أو يناقش أو يفند أو يحيد
دا اللي بنقولوا عليه
شيطان وأخرس شكله شيخ
شكلُه راجل شكلُه واحده
شكلُه تيس شكلُه أفندي
عايز رغيف
شكلُه جوع خايف يقرر
يتمنع عنُه الرصيف
شكلُه الوطن
اللي عُمرُه ماْكان وطن
...... .... ... ... .. .
أحمد الصاوي مصر ٢٧ / ٤ / ٢٠٢٠
ليست هناك تعليقات:
إرسال تعليق