واطلَّع من كِتير جوَّه
واشـد بعـزم وبقــوَّه
عشانها إللي مِن جِنِّ
ومِن آدم ومِن حوَّا
♡♡
وقعت بريحه مرسوخه
في ورده وشمّها دوخه
ماهيَّاش في السِّوا زهره
دي بكل الزَّهر منسوخه
♡♡
سوَّاها الحي كائن حي
وهيَّ الأصل كل الـحي
بكل الخلق في التصوير
ودا الظاهر خلاف الطي
♡♡
والطي جُوَّه ماهوش عادي
دا لمَّا اجى اوصفه يعادي
يخاف يِطْلع ما يِتْصدَّق
من اللي ماله من هادي
♡♡
ولا بادي بكلمة حبْ
ولا شادي بغنوة طبْ
ولا وادي ولا غـــــادي
ولا نادي عليه بيصبْ
♡♡
يصب الحلو من خِيره
ليبقى في الهوى أسيره
ويوصل درجة ان خلاص
مافيش في الدنيا لا غِيره
♡♡
أقول إيه عنَّها تاني
كياني ووجد وجداني
دا انا العايش بأنفسها
ولو غابت أكون فاني
♡♡
أنا غيرها أكون معتل
ولا غِيرها يِحل محل
بقاها ليَّ طب الروح
إله الكون عز وجل
♡♡
هيَ النسمه هيَ الرسمه
على شفايفي بمِية بسمه
وقـبل المـيه كَـم ألـوف
لا تصْلح عد ولا قِسمه
♡♡
لأن ألوفها لا حِسبه
ولو تِضْرب آلات حاسبه
عشان تِجْمع ألوف وألوف
ما تِطْرح م الألف نِسْبه
♡♡
دا انا ذاتي ما باحسِبها
مع إني مِناااااااااااسِبها
دي هيَّ المسأله الصعبه
وعشان الحل ما باسِبها
وعشان الحل ما باسِبها
‘
أسرار مطوية ‘ بقلمي ‘ محمد سيد أحمد
ليست هناك تعليقات:
إرسال تعليق