((عراقي اني))
عراقي اني و ما اساوم ولا بيع القضية
ودمي ارخص من ماتظن وماسويت بعمري ردية
لك هذا العراق الي تلوذ بي كل حرة وصبية
ميهمني الرصاص بصدري تلكيته ومتهزني المنية
لك اني العراق حايط وتلوذ الدول بية
لك اني خيمة الكل غريب ديوان ومنكسر فية
لك اني ارض الانبياء كنيسة وجامع معبد ولطمية
جابتكم صدف ولمتكم من شوارع سراق وحرامية
لك هذا العراق الاسمه هز الكون سمعو ياسياسية
الدم السال بساحة التحرير وبالنجف وبالناصرية
الثمن باهض نسحلكم سحل ودوسكم رجلين العراقية
الزفت ابنها الماوصل عشرين ولا عرف شنهو البعثية
الله اكبر ياوطن شكد بيك زلم ماتعرف الموت وثوانية
هذا العراق حليم وغضب وحذر من صرخة العربية
النجف نادت والبصرة هبت وهلهلت ذي قار الابية
والانبار تفزع والموصل وتكريت تهتف ثورة جهادية
انه ابنك ياوطن ودمي رخيص وماردت احلام وردية
ردت بس وطن وبيه انعيش اخوة بلا ذيول وتحكمنة مزاجية
ويحكمنه الماعاش الحصار وماباع اثاث البيت حتى يجيب خرجية
انتخينه ومابعد رجعة حتى نشوف الوطن عايش بحرية
بقلمي
باسم الخفاجي
٢٠١٩/١٢/١
ليست هناك تعليقات:
إرسال تعليق