( ؛ ؛ ؛ قِطار الفجر ؛ ؛ ؛ )
كان فيه زمان إنسان
عايش ولا همُه
راكب قِطار الهوى
رامِي وراه همُه
ياخُد م الغرام أحلاه
ويحاذر شِباك حُبُه
وقف قِطار الهوى
وأخدُه الطريق دلُه
على حب تاني بيختِلف
غير الغرام كُلُه
حب التراب كالماس
حب الجمال في الناس
وحب تايب مننا
يقدم للإله ذُلُه
حب النبي العدنان
عليه السلام جُلُه
وحب اليتيم
اللي اتحرم من حنان أُمُه
أو فى الحياه ثكلان
يا خساره فقد سَندُه
أو أُم ثكلى أصابها م القدر سهمُه
حب المسير فى الخير
ولو هوا سبب تعبُه
حب الكلام فى الحق
مهما الخِناق يشتد
أو يشِيعُوا الخوف
لآخر حدود الشوف
ويفوق الظلام الحدّ
أو وهم يساويك بالضد
ويا خوفي الخُطا ترتد
من أول طريق الحق
ويسيبني القِطار وانّهد
ويتساوي الإيجاب بالسلب
واعود تاني وابدل قطر
فيه قطر ياخُدنا لنحر
والتاني ياخُدنا لسطر
ونخُط بمدادنا الصبر
عشان تالت يودي لفقر
والرابع يودي لسجن
وانا واقف محلك سِر
ما انا عارف خطوط القطر
يا خساره قِطار الفجر
ليه فاتنا معانا القهر
كان يتقل لحد النهر
ميّحلِي ملوحة البحر
نستنى قِطار النصر
وده تايه ليوم الحشر
لأ يا اخي ليوم الطُهر
هيزمر ويعلن عصر
تتساوى القُصور بالخُص
وتأذن مآذن مصر
ويلف القِطار ع الأُمه
ويحمّل شباب النصر
وتكحّل عنينا القُدس
........ ..... .... .. . .
أحمد الصاوي مصر ٢٣ / ٥ / ٢٠٢٠
ليست هناك تعليقات:
إرسال تعليق