يَا عِيدنَاَ
=========
يَاَ عِيدنَاَ اِللي جَاَي مَكسُوف
مُش لَاقي كَلاَم وحروف
تِشَاَركنَا اِللي لِيه بِنشُوف
وقلوب نَاَس مَلَاها الخوف
أَحَزَاَنهَا رُفُوف ورفوف
وكرونا اللي جَاَي مَحدوف
حَوَاَلِينَا بِهمَه يطُوف
وبِيحصد يوماتي أُلوف
لِلفَرحَه مَاَ عِدنَاَ نشوف
ولاَ حتى صَلَاتنا صفوف
يا عيدنا اللي جاي مكسوف
دا كرونا سرق بهجتنا
وحبسنا كمان في بيوتنا
وف بحر الآلام دوبنا
وبنندم على اللي فاتنا
والنِعَم اللي يوم فَاَرقتنا
وسعاده في لحظه سَاَبِتنَا
يا عيدنا اللي جاي مكسوف
فين تهانينا في زياره
بأجمل جُمله وعباره
مابين الكل دواره
ومَرَاَجِحنا اللي في الحاره
وطبل ياناس وزُمَاَره
وأطفال تِجري بِمهَاره
وبالخيط طَايره طياره
فين دا كله ياخساره
يا عيدنا اللي جاي مكسوف
للفرحه الجميع ملهوف
وبندعي نقول يارب
وعشمنا تزيل الكرب
وتعيده علينا بحب
وسعاده بِتملاَ القلب
==============
( محمـد عنانى - مصر ))
ليست هناك تعليقات:
إرسال تعليق