أنا بعازة كصب
وبيتي يخر وطين
لچن بكل كرم انطيت كصباتي
عسى ولعل وي البردي
الكة اثنين
اخليهن بالبلم
واجدف بدمعاتي
يلكلك محنة ولسانك ينكط طيب
يا شتلة ورد
ياعطر هيل الچاي
يا نسمة برد
بعز آب
ا بلكن تمر
على شباك برداتي
اعاين على الگمر
واعاتب نجوم الليل
وارد احاجي الصور
يمتى كلبه يميل
يمكن صوج الدرب
لا يمكن صوج الريل
واذب الصوج بيهم وما اعلن خساراتي
الي يعشك من صدك
يعشك عيوب المحبوب
ويدور له عذر
يمشي ويسولف بيه وي الريح وي الطير وي جذع الشجر
ما يدنك راسه من سهام البعد ويروي ضما شوكه
بحسرة وصبر
وانا بعز كسرتي حاجيت كلبك
وما فادت حجاياتي
بيا لغة تفتهم للمحبوب
لا فاد المعاتب ولا فادت ابيات الشعر
لا فاد الغزل لا ملح لا شكر
لافاد العشك لا فاد دمعي المستمر
شرايك نحاول على الرسم
وتلون انت لوحاتي ❤️
زينب الفيحاء
ليست هناك تعليقات:
إرسال تعليق