أسمعو وشوفو بوح الصورة وصرخة قلم
صرخة سكوت بين الضلوع وصرخة ألم
صرخة مواطن أتظلم من وطن أصبح عدم
صرخة ضمير يستغيث قبل ما يتعدم
أسمعو وشوفو العجب
الفقير بيتداس عليه
علشان منسمعش صرخة غضب
هو ده مش أسمه غصب
هو ده مش إحتلال
لما يبقى حرامهم هو الحرام
وحلالهم وحده هو الحلال
واللي يخالف رأيهم يبقى كفر
والحساب عندهم من غير سؤال
لما يبقى الفقر عندنا بيكبر يزيد
وهم عندهم الكنوز مثل التلال
ولما نهرب من بيوتنا علشان
منسمعش صراخ بكاء جوع العيال
يبقى ده إسمه إيه غير إحتلال
لما ينصبولنا ألف فخ علشان نجوع
لما يهدمو بيوت الحلم الجميل
اللي في قرى وفي النجوع
لما يصنعو الف قانون لجمع مال
لما تبيعو أرضنا وعرضنا حتى الرمال
لما تاكلو أكلنا وتشربو من دمنا
لما تجعلو كل حياتنا مستحيل
وكل شئ محتمل يصبح محال
كل يوم إعلان جديد عن وظيفه
ومليون الف واحد يقدم علشان
نفسه يعيش عيشه شريفه
ولكن المصيبة إن النوايا مش عفيفه
النويا إن الحمايه كلمه سخيفه
اللي مفروض بيحمي ظهري
بيسرق في أهلي وسبب في قهري
ده انت حتى محمتش نهري
لو كنت فعلا ليك قدر
فأنت عمرك ما كنت قدري
وعمرك برضو ما كنت إختياري
إنت وجودك كان إتضطراري
ف بلاش تقول إنك يميني أو يساري
أو إنك حتى شخص إداري
أنت شخص سارق قراري
سارق حياتنا كلها بقرار وزاري
يبقى ده إسمه إيه غير إحتلال
لما تبقى مليون نقابه
ملهاش علاقة بالرقابة
غير إنها تسرق في الغلابه
يبقى ده أسمه إيه غير إحتلال
لما يبقى المريض تجارة
والسرقة في التعليم شطارة
والحرامي محتاج أماره
غير إن عنده الف عماره
ومعندهوش مصدر حلال
يبقى ده أسمه إيه غير إحتلال
مستكترين علينا حتى نعيش
بتسرقونا كل يوم
ولما نسأل فلوسنا فين
تقولولنا ممعييش
يعني الاجابه أصبح مفيش
رغم إن كل حاجه في الزياده
بترول زياده وكهرباء وغاز زياده
وعندكم منجم الدهب الأصيل
وعندكم حاجات تانيه أكتر كتير
لكن السياسه مش عاوزه الفقير
عاوزه المدير بدرجة غفير
وياريت محدش يسأل كتير
واللي يسأل قولو مفيش
واللي ميسمعش الكلام هاتو الشاويش
والشاويش هو اللي فاهم
العيش مفيش والماء مفيش
والأرض برضو كمان مفيش
يبقى ليه راح نعيش
طالما عندك منسويش
مش مهم مين صح ومين غلط
ومين عمل ومين اللي قال
ومين اللي في الهم شال
المهم مين هيدفع يا عم ويا خال
يبقى ده أسمه إيه غير إحتلال
لما يبنو حولنا الف صور
علشان يعيشو هم في قصور
وكأننا كأئنات غريبة
من أقدم عصور ك الديناصور
اسمعو أفهم يا ساده
الحكايه مبقتش عاده
الموضوع أصبح عباده
والكل بقي عبد القياده
عبد القياده عبد السياده عبد ......
الموضوع مفهوش زياده
وإما تقبل تعيشها ساده
وإما مصيرك الاباده
فاهم ولا نقولها تاني
إياك تفكر تعترض
أصل يا أبني لو أعترضت
هيقولو كان نوع وأنقرض
ولو حتى أعترضت
طبعا أقصد نفترض
هيقولو مجنون وأتعرض
يعني خلاص أصبح مرض
والمرض محتاج علاج
والعلاج حطان حديد
وكهرباء وحبة مساج
يعني يصحبي
هيفسحوك على البلاج
#بقلم حماده الشاعر
ليست هناك تعليقات:
إرسال تعليق