... *** افهم كلامي *** ...
إفهم كلامي ، كلمة كلمة ، من سكات
الحب ضايع ، والضمير من فترة مات
تاهت حياتي ، وسط زحمة غدارين
واحنا بنشرب ،دم بعض فى كوبيات
إوعى تقول ، ليه التشاؤم والملل
حبة حاجات ماتت وأولها الخجل
واللبس عايب ، والشباب مليان علل
وكتير مشاكل ، والفرح جنب اللى مات
صحاب بتغدر ، والخيانة للحبيب
وألف جرح يجننوا أحسن طبيب
واللى حلم هاجر ، وبيسموه غريب
واللى غرق فى البحر جوه العوامات
انا مش بأغني كلمتين فى المهرجان
بأحكى المواجع ، واللى مات فى المزلقان
أسعار بتخنق فى البشر ، صبحت جنان
والطفل تايه فى الشوارع والحارات
نسينا طعمك يافرح ، رايح لمين؟!!
وقفوا الحبايب عند كلمة مخطوبين
نشكي لمين الكل دايخ فى السنين
العقل عاجز ، والمشاكل دومات
بقلمي .. الشاعرناصرعطامحمد
بقلمي .. Nasser Atta
البلد .. مصر
ليست هناك تعليقات:
إرسال تعليق