مر عيد واجه الثاني
وأنت ولا جذب مريت
ولا مرسال ألي وديت
تعال شبيك شمتاني
تاه الفكر منك
لو عزمت الراي
شنهو تريد تنساني ؟
بعيد الدرب عنك ؟
لو نسيت دروب عشكي وياك
جم عنوان ألك خطيت
بيهن والدروب هواي
وختمت شفافك أبهداي
وكتلك انت عنواني
تعال وشوف
شنهو السو بيا الخوف
مرعوب بجفاك
وكطعتني سيوف هجرك
وانت شرياني
متانيك وأعد أيام
يخاين مات هرشي
ويبست أغصاني
عليا اليوم مر طاريك
كالولي نساك هواك
كلت شلون ينساني
تعال متانية جفوفي
وملهوفة صدك روحي
تريد تضمك أحظاني
تعال وندي فوك شفاي
أنت العيد لعيوني
ومن اعطش اشوفك ماي.
انا بلياك موش أني
أكلني الشيب بغيابك
كلي شلون أرد لصباي
لا تبطي علي مشتاك
اذا ما جيت
ماظن بعد تلكاني
تعال أنعيد اني وياك
ونطش للعشك جكليت
واكلهم رد الي هواي
وأفرح بيك خلاني
منذور العمر لعيونك
ويا الروح
وكل حروف شعري
وما طرى لساني
كل سنيني ألك
يا خنجر البجلاي
تحز مني الدليل
وما كلت جاني
تعال ولا تشمت الناس
بيا وتسر عدواني
شكلك بعد
وانت أدرى بخفايا الروح
ياروحي ومهجتي
وبهجة ألواني
تعال العهد
خطيته ألك بدموع
كلبي ونار بركاني
يبس شمعي يتنخى
الحنة وي الياس
وصواني الفرح غابت
فرشت أحزاني
تعال وسكت ظنوني
#تعال شبيك شمتاني
عبد الكناني
الأربعاء ٢٨ / ٦ / ٢٠٢٣
ليست هناك تعليقات:
إرسال تعليق