------- لفتة... -------
مرّت مثيل الطّيف في خفّتها
سرّعت مشيتها
تلاقت معاها العين في لقتتها
......................
وقفت...وتسمّرت
ومسلوب العقل من غير قدرة دُرت
نحاول نقدّم على الخُطى ما قدرت
كأن الأرض مسكت بالرجل شدّتها
يضيع مني العقل... ما تصوّرت
بنار لهبت في الكبد كوتها
......................
في وجهتي نسّاني
وضيّعت حتّى قبلتي ومكاني
بجسد منهك بالتعب و فاني
وحسّيت المشاعر لاهبة عشقتها
وحتّى مرور الناس ما صحّاني
وبلفتة منها...مشاعري عرّتها
.. ........................
عيني تتبّع فيها
وهيّ أنيقة وازنة خطاويها
في غفلة مني تلاقت مع عينيها
ويمكن إعجابي من العيون حسّتها
تظاهرت أمامي بالإعجاب ما يعنيها
وبكل حنكة...سرّعت خطوتها
........................
تبّعتها مظطرّ
ومن غير قدرة في القدم نجرّ
طقس بارد وأنا حرقني الحرّ
وكل المشاعر من الجسد سلبتها
وعشق مثلها ما عاد ليه عمرّ
لكن مهزوم...مشاعري حبّتها!
.........................
مرّت مثيل الطّيف في خفّتها
سرّعت مشيتها
تلاقت معاها العين في لقتتها
الهادي عباس- تونس
ليست هناك تعليقات:
إرسال تعليق