* قصيدتي ( حب عمري )
قصه حب عمري
مرت يوم في بالي
لاقيتها ذكري حلوه
كأنها لفته من خيالي
وانا ماشي وحدي
والقلب خالي
أولها نبض سمعته عالي
قمر منور كان قبالي
مختال بيضوي في العلالي
شفته يومها من غير معاد
خدتني يومها رموش عينيه
وقلت يمكن ما اهون عليه
لاقيته فجاه من تاني عاد
دوبني يومها في المكان
وسابني يومها أسير كمان
انتظرته يجيني تاني
وحلفت يومها ما اسيب مكاني
واللي يشوفني يقولي مالي
ماشي شارد في الليالي
عيوني سارحه صعب حالي
ولما فجاه شفته تاني
حلفت والله ما اسيبه تاني
مشيت وعرفت كمان مكانه
سألت عنه ما بين جيرانه
أهله وصحابه كمان خلانه
قالولي يومها حاجات كتير
معناها أبعد بلاش خطير
نجم لامع في الليالي
قمر وساكن في العلالي
سوره عالي ما ينتهيش
حراسه ظاهرة ما تختفيش
رموشه طايله روح وعيش
قلت هو ولا غيره تاني
ترهبوني تخوفوني
والله تاني ما اسيب مكاني
الحب هو ما حد تاني
أعيش هواه واموت فداه
ولا حد غيره أعيش معاه
سمعت صوته بصيت لاقيته
من سوره طالل يقولي هايل
تعالي أصعد سوري مايل
من إحساسك القلب شايل
قلبي هفهف من كلامه
عيوني بكيت من دلاله
ايديا لانت من سلامه
عزالنا خزيو طاب وماله
ما أنا وحبيبي في العلالي
ندوب نغني في الليالي
حب عمري ما بين ايديا
ربي وفق جابه ليا
عشنا قصة في الحياة
كل همي انول رضاه
شريك حياتي وقلبي ليه
وعمري برضه ما اهون عليه
* انتهت من فضل الله تعالى قصيدتي ( حب عمري ) ونؤكد على أن جميع حقوقنا محفوظه وفقا للقانون مع أطيب تحياتي الأديب الدكتور محمد يوسف
ليست هناك تعليقات:
إرسال تعليق