( ؛ ؛ ؛ حسبة برما ؛ ؛ ؛ )
وطول الشهر نستنى
في يوم نقبضّ
ياخُدنا الفِكر لحسابنا
واقوم اضرب
إشي للحمه وخضارنا
واشوف واحسب
فواتير للْنور وللميه
نهار ابيض
ودروس يا عيني بالحصه
هاتولي اشرب
عشان اجمع عشان اطرح
عشان احلب
دا حسبة برما
مربوطه على مُرتب
هفتان يُزُك ويشوفها يقوم يسكّر
وأسعارنا بتستنى
عشان ترفع
وتُجارنا لا يوم ترحم
وسنا سنانها لعلاوه
هتتنثر
ونِدَّارَى ونِجَّارى مفيش مهرب
وفين اهرب
دا كُلُه زيي بيعافر ولا بيهرب
وصابر لما نتحاسب عشان يكسب
وشايل كبتُه
مش راضي في يوم يغضب
ويطوّح ويتهادى
بسُرعِة كوره ع المضرب
لا بيسأل ولا يناقش
ولا شطانُه يوسوسلُه يقوم ينظُر
مصري يا عين
ويشهدلُه الهرم الاكبر
على ذُله أثارُه كمان يا واد تشهد
متحمّل كدا يجاهد
ومستني العيال تسند
وموت يا حمارنا ونسافر
ونِلقى هناك كفيل يعنِد
ونتحمّل ونتبهدِل
وغُربه هناك مرار تشرب
واشوف بلدي
على الشاشه
وزي الجنّه وبتبعد
وتِبكي عنيه بدموعي
وقلبي جوّه متكهرب
بيستنظر ليوم منزِل
دا شُوقِي نهر متغرب
وأرضي نفسي
يوم تشرب
ويظهر خيرها
لولادها ودا أصعب
وفينا برضوا من خيرها ياواد يحلِب
ويحِلب فيها
وبقلمُه يا واد يشطُب
على صابر دماغُه فى آخرتُه يكسب
......... ...... .... .. .
أحمد الصاوي مصر ٢٨ / ٥ / ٢٠٢٠
ليست هناك تعليقات:
إرسال تعليق