وده كله ليه
=========
يعني أيه عشان أعيش
أنا في البلد دي
لازم أطاطي وبالفلوس
كله يعدي
يعني أيه يا ناس أبيع
أنا في ضميري
وأسكت وأشوف حقي
يضيع ويأخده غيري
يعني أيه لما أعافر واجيبلي
لقمة تسد جوعي
وأرضي تنشف من الخضار
وتموت طيوري قدام ربوعي
يعني أيه يهده الحطان
أنا فوق دماغي
يمكن عشان مفيش فلوس
ومش عارف الاغي
حد يقولي عملت ايه
يا ناس قولولي
أنا كل ذنبي في الدنيا دي
أهلي جبوني
طول عمري عايش في البلد
وكافي شري
ومقضيها عيش وجبنة والبصل
ده زي ضلي
علشان احويش وأبني بيت
ويكون ده ضلي
مهو بعد عمر من الشقى ومن المرار
ده اللي فاضلي
وفي ثانيه ضاع كل شي وده
مش بأيدي
حاسس خلاص إني بموت
قطعوا وريدي
طب أروح لمين وأقوله غتني
أنا وليدي
الرحمة فين يا رب أنت عالم بحالي
الشعر شاب والقلب داب من صغر
سني
البيت وراح وضهري اتكسر وأنا
مين يعني
ليه دايما الهم كده ماسك في ديلي
كل ما أسيبه يجري عليا ويقول يا
طيري
أوعاك تسبني يا صاحبي يوم أنا
مش هسيباك
أنا اللي دايما زي ضلك أنا حبيبك
أخرتها ايه يا دنيا تاني مخبيالي
خلاص بقينا في الشارع أنا وعيالي
وده كله ليه عشان بعيش وما طلبت
حاجه منها غير بس عيش
2020 /4/9
#ماجدة_البهيدي
ليست هناك تعليقات:
إرسال تعليق