(( زرع بلا ثمر ))
قولي أيه ذنبي ياغالي
عشان تسهرني الليالي
أملي فيك كان فى العلالي
ظني خاب وشغلت بالي
جرحي طاب ومين يداوي
سهم غدرك ليا كاوي
قولي ظلمك أيه يساوي
أملي ضاع ومعاه سنيني
كنت حسباك ضي عيني
قسمت ظهري وقسمت ليلي
وفيت معاك ونقصت كيلي
كل إللي نلته إتهد حيلي
___
كل قرشي كان حلال
ليه تختار أم العيال
والجزاء قطع وصالي
أنا أم وانت إبني
جدار الهجر ليه بتبني
قولي أيه فيا عايبني
لما كبر سني سايبني
____
ماده إيدي ما زلت لسه
بس مش علشان تبوسها
بشرة إيدي حالتها جافه
والشقوق ع الكف ناشفه
والصوابع صابتها رعشه
ماده إيدي محتجالك
ماده إيدي مزلولالك
ماده إيدي الحوجه مره
أنت ليه عاملني ضره
والمدام عاملها دره
____
ليا رب إسمه الكريم
صاحب كرم جواد حليم
وأمري كله فوضته ليه
قلب أم صعبان عليه
وإنت إبن قسيت عليه
لما تزرع زرعك راعيه
زرع إيدك بكره تلاقيه
وتر المظالم تعزفه
وأنت الوحيد ترقص عليه
وكل ظالم مننا ربي يجازيه
بقلمي نبيل عبد الحليم
3/2/2021
ليست هناك تعليقات:
إرسال تعليق