* أنا الظالم *
................
أنا الظالم وأنا المظلوم
وأنا إللي إخترت جوايا
أعيش عاشق وأكون محروم
يعيش العشق دنيايا
وأنا الجارح لقلبي ساعات
وأعيش الدمعه في حكاية
وبرسم صورة فيها بسمة
وضحكة حلوة علي الرسمة
وتنزل مني دمعايه
وتملا الصورة بالأحزان
وتمسح منها ضحكاية
وأنا إللي بعيش بأحلامي
في دنيا حلوة عجباني
وفجأه شيء بياخدني
يصحي جوا ألامي
جناين شوك بتتألم
ودمع الخد سهاني
ونزل يجري من همي
وخطف الفرح من تاني
وأنا إللي بقسى من جوا
على نفسي وبظلمها
وتصرخ آها في العتمه
تشق الصرخة حناجرها
وتطلب مني ضحكاية
تطلع وتنسى مشاكلها
وأقول أضحك عشان أنسى
ألاقي الضحكة مش حاسة
بطعم الفرحة جوايا
وحزني يجي يتعاتب
يقولي عليك أنا عاتب
دا أنا جواك وأنا الغالب
ومهما تحس بالفرحه
أنا إللي ساكن أحضانك
وأنا ليلك وأنا نهارك
ودايما أعيش علي جرحك
وأنا إللي في آخر الضحكة
ذكرى حزينه بدمعاية
#كرم ميخائيل
ليست هناك تعليقات:
إرسال تعليق