عنوان القصيد ( الوالدين) بقلم حاتم بن حورية
تونس ولاية نابل معتمدية حمام الغزاز
إسمع يا سامع نوصيك
دير الخير في والديك
و قد ما تقربلهم الدنيا تجيك
والديك
والديك هوما تاجك
و بيهم يكبر شانك و راسك
و هوما إلي يضمرو بإحساسك
و هوما مدرستك و علمك و كراسك
و هوما هدايتك باش الرب يهديك
ربك
ربك وصى بطاعتهم
و توطي عينك يوم غلطهم
و تحارب الدنيا في رضايتهم
كنوز العالم مايجيوش في فرحتهم
عند قولهم يا ضنايا ربي يحميك
أمك
أمك يوم تغلط تعديلك
و تعاود تغلط بالهداية تدعيلك
و بصلاتها تضوي قنديلك
و ديما في حضوضك تجريلك
رافعة راسك و بقلبها تضويك
تضويك
تضويك بدعاها
يوم تفارس لصلاها
طامحة في ضناها
يلبسها كساها
منذ لغاك و لغب سنيك
و بوك
و بوك إلي منعك من جوعك
و هو إلي خلاك فارح ماسح دموعك
و بين ندادك مضويلك شموعك
و زهي وقت لغاك و دبيانك و رتوعك
في أول خطوة على رجليك
في أول خطوة
في أول خطوة زهالك
ضاحك فارح بمسارك
و انت تتمايل بين يمينك و يسارك
و تتطايح مع جهامتك تتعارك
و في كل شبر ساقك تخلي بيك
و أمك
و أمك تقول يا سعدي
ضنايا عمل سويقات و هي تنادي
و تشكر في الكريم الهادي
و تغني و تشادي
و فارحة بالسعد ليك
خاطر
خاطر هي الولادة
و هي الحاضنة الورادة
و هي الحنينة الوسادة
و هي اللبوة الهدادة
وهي ضلعك إلي مقويك
ونزيدك خاطر
خاطر بوك هو الصيد
في عينك ما لوشي نديد
و هو صلب عمودك الحديد
وهو قدوتك بالتحديد
و هو ظهرك إلي حاميك
وإسمع يا سامع نوصيك
والديك حطهم بين عينيك
بقلمي حاتم بن حورية
ليست هناك تعليقات:
إرسال تعليق