نانسي
ياأم الضحكة بتخطفنى
وتجمعنى وتقسمنى وتطرحنى
صباح الورد علي عيونك
ياسكر داب ودوبنى
صباح مرسوم علي خدودك
يوصف للقمر جمال عودك
يجرى علي بابك ويستنى
ياوردة جوايا بتفتح
وبتذوق ايامى بالحنه
ياشجرة فل وبتطرح
علي كفي ميتين غنوة
طعامتك دى ..وحدها حكاية
مواويل علي الناى بتتغنى
الله اكبر
علي كل من شافك
ولا كبر ولا صلي ولا سمى
ربيع حبك مكفينى
وغانينى عن الناس
والصحبة واللمه
ولما اسمعك تحكى وتبتسمى
اغمض عينى
واعيش وياكى بالجنة
ولما تنطقي اسمى
والقي كلمة بابا سابقاه
شفايفك النونو تجننى
وكفك الوردى بيرسمنى
قلب بجناح ..طايره جواه
أجرى عليك واضمك
ولا أعرف سنى من سنك
وأغنيلك تغنيلي
تقوليلي ..احكيلي
عن حلم تاه
وياك صار له معنى
..يانجمة ب سما روحى
وضيها مبدور بالكون
يانقش موشوم جوايا
ياطعم الحب واللون
اياك يابنتى تهتز حروفك
او تستسلمى لصمتك وخوفك
خلي عزيمتك جبل
وايدك في ايدى نزرع امل
ولو مرة حلمك انكسر
اوعى الايام تشوفك
لملمى فتات حلمك
والضمى حباته بصبرك
هتلاقي بكره بيضحك
علي شفايفك النونو
وتقولى يابابا ..انا بنتك نانو
....
أسامة فؤاد
ليست هناك تعليقات:
إرسال تعليق