----------- راضون --------------
مهما حكمت...
مهما حكمت
يا زمان رضينا
الراس ما وطينا
تعدى العمر
آلام... ما تهنينا
.............. .
تحملنا الألم وصبرنا
وقوت يومنا
وما قدر وفرنا
مشينا حفايا
على الطريق وسرنا
وقداش جعنا
ولغيرنا ما حكينا
والقلب صامد
وعلى الذل ما طاوعنا
تحملنا صقع الليل
وتناسينا...
....................
ما تساوموش معانا
احنا ذممنا
ما تشترى باعانه
لا رجالنا...
ولا شهامة نسانا
خبز الكرامه
يتخبز بايدينا
وحتي...
كان الوقت ما ڨادانا
أولاد أصل
وعلى الأصل ما تخلينا
..................
عنا التسول عار
وخبز النذاله
ما يدخلنا ديار
الخبزه تتقسم
بين جار وجار
ومع الجوع...
متاع الناس ما هزينا
ومهما عانينا
في العقل كبار
ولتو... نحكموا
والأرياح ما تدينا
.................
لتوا قدرنا عالي
ونمشوا لڨدام
وما رجعنا لتالي
حملنا الألم
والبرد طول ليالي
وحمدنا الكريم
وبالأحكام رضينا
وهذه خلاصة حالي
عنا كرامه
والرأس ما وطينا
...................
مهما حكمت... يا زمن رضينا
الراس ما وطينا
تعدى العمر... آلام ما تهنينا
الهادي عباس-تونس
ليست هناك تعليقات:
إرسال تعليق