(((واقع الفيسبوك)))
الشاعر بحروفو بيرسم لوحات
كل لوحة بتحكي عدة لغات
بيهمس بورودو همس النايات
وبيحصد مردودو بالتعليقات
في ناس بتقرا بهمس الشفات
بتشهق وبتزفر جملة آاااهات
وفي ناس بتقرا بس بالنظرات
مابيفرق معها معنى الكلمات
وناس بتضلا تقلّب صفحات
وما بتعرف تعمل غير اللايكات
وناس شغلتها تصور أكلات
وتعرض منشورا بالمجموعات
ودغري بتجيها الاتصالات
وبتعمل حالا ست الستات
وكأنها بتعرف تعمل طبخات
وبينبهرو فيها كل البنات
وهيي جايبتهن من المحلات
و ناس بتضلا توزع بسمات
لما بتمرقلا احدى النهفات
وبتصير تعللي بهالضحكات
ثبت ياربي علينا العقلات
هي حال العالم بالمنشورات
ناس بتفيدك بالمعلومات
وناس مشهورة بالتفاهات
و ناس بتبيعك بالوطنيات
وهيي هربانة من الجبهات
وناس مختصة بالترحيبات
منور ياغالي من دون لمبات
يسعد صباحك مع الوردات
ويسعد هالمسا بكل السهرات
بدنا نتحمل كل الحالات
والله يكفينا شر اللايذات
بسام محسن - سوريا
ليست هناك تعليقات:
إرسال تعليق