بعشق كسوفها
انا بعشق ف البنت كسوفها
لما حبيبها يكون قدامها
وبراءة صوتها وإحساسها
والرقه اللي تبان ف كلامها
والوقفه اللي قصاد دولايبها
والشنطه المليانه حاجات
وحنينها لأحضان دباديبها
و الرغي ف تليفون لساعات
ومعاكستها شويه لروحها
لو كانت قدام مرايات
ودلعها المقصود كالعاده
والدم الشربات وزياده
والجدعنه لما تكون فيها
رقبتها بتفضل سداده
انا بعشق شكلها مع روحها
أنوثتها وحلمها وطموحها
أمومتها و قلبها ودلعها
خوفها من الحب اللي وجعها
وبساطة مشاعرها الحلوه
لما تعوز واحد يسمعها
أنانيتها مع اللي تحبه
وتكون دنيته ويكون كونها
و الضحكه اللي ف عز ما تزعل
تلاقيها تبانلك ف عيونها
انا بعشق ف البنت جنونها
خالد المنصوري /مصر
ليست هناك تعليقات:
إرسال تعليق