فصام الشخصية - شيزوفرنيا !!
كثيرا ما نسمع عن الفصام ، وكثيرا من الناس أول ما بيسمع عنه تلاقيه تلقائيا بيقول يعني شخص بداخله شخصيتين ويسكت مهو ده اللي معظم الناس تعرفو !
هو ظاهريا بيبان كده ، لكن في الحقيقه له أسباب اكثر تعقيدا ليصل الشخص لحالة الفصام .
بس قبل كل ده لازم نعرف يعني ايه فصام في الشخصية .. الفصام ده اللي هو أسمه شيزوفرنيا ،
والفصام مرض شائع على مستوى العالم ، يعني من بين كل 100 شخص على الاقل بيكون في 1 مريض بالفصام .
والفصام بيرجع إلى سببين إما بسبب عوامل في الجينات الوراثية ، أو من خلال الإجهاد العقلي والعصبي الناتج عن ضغط الحياة ، بمعنى أن البيئه المحيطة للفرد لها تأتير فعال بأن الشخص ممكن أن يصاب بالفصام ، مش معنى كده إن أي شخص مضغوط في الحياة لازم يصاب بالفصام ،
لأن في عوامل أخرى على رأسها تعاطي المخدرات والعامل ده سيجعل أي شخص متعاطي المخدر بأنه سيدخل في حاله من الفصام ، ولكن الفصام هنا هايكون مؤقت لحين انتهاء مفعول المخدر .
لكن كلامنا هايكون عن متلازمة الفصام ، هانتكلم عن الاشخاص الذين يعانون من الفصام بشكل دائم .
السؤال الأهم إيه أعراض الفصام ؟
أعراض الفصام بتكون أعراض إيجابيه ، وأعراض سلبيه ، وأعراض إدراكيه .
وتحديد الأعراض سواء إيجابيه أو سلبيه أو إدراكيه ، بتكون على حسب درجة الوضوح والخطوره !!
الأعراض الإيجابيه رغم إن اسمها إيجابيه الا انها أقل خطوره لأن الأعراض بتكون واضحه وظاهره على الشخص .
وهي الأكثر إنتشارا بين الناس ، وبتكون عباره عن هلاوس بصريه أو سمعيه !!
الهلاوس البصريه تجعل الشخص المريض بالفصام طول الوقت بإنه شايف حد كأنه موجود قدامه ومعاه طول الوقت ، ممكن يبقا شايف حد في خياله بس الإدراك هنا حدث به خلل بأن العقل الواعي فقد السيطره ومبقاش عارف يفرق بين الخيال والواقع ، فطبيعي جدا اللي بيشوفه بخياله اللي هو طالع من اللاوعي ، العقل الواعي يترجمه على انه واقع حقيقي .
فتجد مريض الفصام في الحاله دي يؤكد أنه شايف حد معين وبيتكلم معاه حتى لو كان الشخص اللي بيكلمه متوفي مثلا زي ما حدث في فيلم ( اسف على الإزعاج ) للفنان أحمد حلمي ،
أو تلاقيه شايف إنسانه ليس لها وجود إلا في خياله مرسومه بأدق تفاصيلها فقط في اللاوعي ، وبطبيعه الحال وبفعل الخلل الإدراكي سيترجمها العقل الواعي على إنها حقيقه ،
ومن الممكن ان يعيش معها قصه حب ويحدث ترتيبات للإرتباط وهي في الاساس غير موجوده مطلقا إلا في خياله .
أو انه شايف مثلا أسد بيطارده طول الوقت .
أما الهلاوس السمعية بتخلي المريض ممكن يسمع أصوات أو يسمع أحدا يتحدث معه بصوت شحصية يعرفها حتى لو كان اللي بيتحدث معه شخص متوفي ، او شخصية كرتونيه ، او شخصية غير موجودة من الاساس !!
بس الأخطر من ده انه مش بيقدر يسطر علي نفسه ولا يستطيع رفض أي طلب لصاحب الصوت ده اللي ممكن يقوده لأشياء يضر بها نفسه أو يضر بها الأخرين ، زي انه ممكن يقتل مثلا أو يقوم بالإعتداء على أحد ، وضرر الغير والإعتداء وخاصه القتل هي الاكثر انتشارا ،
لان وقتها بيكون عنده إضطراب عقلي ويرى الخيال على انه واقع .
ولكن ليس عنده القدرة والسيطرة على نفسه بان يرفض الأوامر الناتجه عن الاصوات حتى لو إنه عارف انها غلط ،
لأنه بيفسر الأفكار اللي في اللاوعي على إنها حقيقيه قادمة إليه من الخارج فبيفسر الأمر ده أنه نابع من العقل والإدراك والمنطق اللي هما في الأساس بهم خلل ، لذلك يجد نفسه مضطر لتنفيذه تلك الأخطاء .
* تاني نوع من الأعراض حاجه أسمها الضلالات ، ودي عباره عن أن مريض الفصام بيكون عنده قناعات مبنيه علي أسس معلوطه وهو الوحيد اللي شايفها صح ، ولو سألته عن أسباب إيمانه بالقناعات دي هاتلاقيه بيقول كلام وتبريرات ليس لها معنى منطقي ،
مثلا انه دايما عنده شعور إن في حد بيراقبه فدائما بيكون عايش في شك وحايف من كل اللي حواليه لأسباب غير منطقيه ، ممكن يشك في صديقه مثلا لو لقاه بيشرب الشاي بدون سكر ساعتها هايفسر ده وممكن يقول هو محطش سكر عشان السكر مسموم وعايزني أحط منه لنفسي عشان يتخلص مني .
عايش دائما في دائرة الشك والمؤامره ،
ومن أعراض الحاله دي انه بيحس انه محور الكون وكل الاحداث بتدور حوله فقط يعني لو فتح التليفزيون وأتفرج على برنامج معين بيشعر إن دي رساله موجه له ، ولو شاهد أحد الأفلام بيشعر إن الفيلم ده معمول على شانه عشان يحكي عنه او مثلا بيعتبرها رساله مشفره ولازم ينفذ احداثها .
مريض الفصام بيكون عنده تشويش في الافكار للدرجة اللي تجعله لا يستطيع إكمال أي شيئ سواء قرأة أو مشاهدة مبارة أو أفلام او أي شيئ ،
وهاتلاحظ إن كلامه غير مرتب لكنه واخد الشكل الجدي ، يعني ستجده بيتكلم في موضوع ويدخل في موضع اخر بأحداث أخرى ليس لها علاقه بالموضوع الاساسي ، وتلاقيه بينتقل من فكره الى أخرى ويرجع للفكره الأولى وينتقل على فكره ثالثه ورابعه دون أي روابط أو علاقه بين المواضيع ، وأوقات بينسى الفكره الاساسيه اللي بدء بيها الكلام ، كأن حد سحبها من عقله .
لكن الاعراض السلبيه بتكون اكثر خطوره لأن اعراضها مش بتكون واضحه ، هاتلاقيه فاقد الشغف ، وحبه وحماسه للحاجه اللي كان بيحبها ومتمسك بيها بيقل تدريجيا .
وهاتلاحظ عليه إنه بقا شخص عنده لامبالاه ومهمل بعد ما كان بيركز علي أدق التفاصيل .
مريض الفصام مع مرور الوقت تركيزه بيقل وبيكون عنده حاله من الإكتئاب تجعله يهمل في نفسه وفي مظهره ويصبح شخص عشوائي ، عشان كده خطوره الاعراض السلبيه بتكون في عدم الوضوح والحاله بتتفسر علي انها حاله اكتئاب ، اللي بيشوفه بيقول إنه شخص عنده لامبالاه وعدم تحمل للمسؤليه ومحدش يعتمد عليه .
كل الأمور دي بتجعل المريض تثبت لديه فكره العدوانيه لان بيكون شايف كل الناس ضده وبيعاملوه على إنه شخصية غير مرغوب فيها .
الاخطر من كل ده لو شخص مصاب بالفصام واجتمعت به كل الاعراض سواء إيجابيه أو سلبيه أو ادراكيه أو الضلالات الفكريه ، الشخص ده هايكون بمثابة قنبلة ذاتيه الإنفجار في اي لحظه .
( أسف للإطاله )
A.A.KH
............................................................................
للتكريمات فضلاً وليس أمراً وأشكركم لذلك
الاسم / أيمن أحمد خلف
الصفه/ مدرب تنمية بشرية
LIFE COACH
البلد / مصر
A.A.KH
ليست هناك تعليقات:
إرسال تعليق