(الرضا باللي اتكتب)
بقلم"محمد مبارك"
فيه ناس تعيط بالسهر
بالشُرب مثلاُ والغياب
بيردّوا روح ويسكّوا باب
ويبطلوا اللوم والعتاب
أوقات عياطهم بالسباب
وساعات عياطهم بالأدب
فيه ناس عياطها ف انها تقول " تمام "
وفيه ناس عياطها ف إنها تفتّح كلام
وفيه ناس كأسراب الحمام تبكي وماتسبش الأثر
وفيه ناس تعيّط بالرجوع للي اتكسر
فيه عياط حرير وعياط حجر
وعياط شظايا من اللهب
أعرف بشر بيعيّطوا بالاندماج
فجأة يحبّوا يخرجوا ومايقعدوش مع نفسهم
واعرف بشر بيعيّطوا جوّه السياج
مايشوف دموعهم إلا هما وضلهم
واعرف بشر بيعيطوا ف حجر ناس بتحبهم
ان شالله يبكوا قصاد قبورهم ع العتب
إياك تظُن الخد ناشف نبقى عال
احنا بنمحي دمعنا زي البيوت ف الهجره ما بتمحي العزال
جربنا نبكي قصاد بشر مش طيبين
أهدرنا دمع وفضفضه ضاعوا هباء زي السنين
فبقينا بالخبرة بنبكي بدون بُكا
ودموعنا صبحوا بينزلوا متنشفين
أقدم عياط هو الحياة وانت بأتب
أبسط عياط هو الرضا باللي اتكتب
ليست هناك تعليقات:
إرسال تعليق