أنا شاعر
(أنا شاعر)
أنا شاعر باحب الكون
ساعات هادى ساعات مجنون
ساعات حر ساعات مسجون
ساعات تايهـ ساعات موزون
ساعات عايش ساعات مدفون
ساعات باضحك ساعات محزون
بقلمى وصوتى وكلمتى
أكون أولا أكون
مكتوب عليا
اشيل هموم وهموم
ولا حدش يشيل همى
واشرب آلامى كاس ورا كاس
والأرض أبويا والسما أمى
واروى قلوب العطشانين
بالحب والإحساس
واكتم آهاتى ف دمعتى ودمى
وهاقول ايه
ولا هاعمل ايه
ده قدرى
ودنيتى وعمرى
والأمر أمر الله ماهوش أمرى
وانا بس هاعمل ايه
ايه بس اللى بإيديا
هوه انا اللى خلقت روحى
وللا بهوايا جروحى
آااااااااااااااااااااااااااااااه
آه لوماكنتش شاعر
كان زمان مرتاح
بعيد عن الجراح
ولا كانش ده حالى
بين الهنا والحزن
رايح وجاي سواح
مليون سنه من عمرى فاتو
وفوق منهم شهور تابعه
سنين من عمرى فاتت
راحت ومش راجعه
واللى باقى منه لسه
الله أعلم كام سنه
ماعرفش كام
وازاى هيبقى حالى
هافضل كده شاعر
وللا هاسلم لسكاتى
القلب والليل والمشاعر
وهاقول ايه هو ده قدرى
والأمر أمر الله ماهوش أمرى
***
مكتوب عليا
عشرة سكات الليل
أشعر واعبر وانظم المواويل
الناس تنام الليل واناصاحى
باملا الورق كلام حزين وجميل
اكتب قصيده فى الغرام
اكتب قصيده فى النخيل
اكتب قصيده فى الوطن
اكتب قصيده فى الرحيل
اكتب قصيده فى القمر
اكتب غنوتين فى النيل
هوه كده الشاعر
غرقان فى بحر مشاعر
سعيد ومتعذب
موجود ومتغرب
عايش ومتغيب
أد ايه بيقاسى
ولنفسه دايما ناسى
عشان يكتب جمله فريده
ليها معنى ولونها جميل
عشان يخلق فكرة فريده
يعمل منها أحلى قصيده
فيها فجروشمس وليل
أنين
شاعر الإحساس
رضاعبدالحميد
ليست هناك تعليقات:
إرسال تعليق