سلة عتب .....
حيرانة وبعيوني وصف مايونصف .....
مكبوتة من هم الوكت ....
ولساني ما ينطق حرف .....
رحت اعتني لأهل ألوفا
لكيت بديهم جفا .....
وحجيهم يقصف قصف.....
غريبة بنص ناسي وهلي
ووني كل ساعة يعتلي.....
والقلب يرجف رجف .....
بسماي طيروا غيبة
يردون اذل الهيبة
صرفوا الممنوع من الصرف .....
اجيتلهم بصيغة الحب
شايلة سلة عتب
تعثرت بنص الدرب من كثرة جروحي والنزف .....
يومية بناس انصدم
وين المهم وين الأهم
كل ساعة وجوههم تختلف ......
شحجليكم وكت المصلحة
بالف مرحب بيبانهم متفتحة
وقلبي يصعدوا للمشرحة
شايل وجع مية والف ....
كافي ظلم كافي قهر
منكم روحي تعتصر
ملت عيوني من السهر
وملت المخدة من الذرف ......
لخاطر الله عتقوني
ومن جلسات القشب شيلوني
مو طين اصطناعي انا
وبيديكم تشكلوني
انا بشر من دم ولحم
واحمل گلب كلش ترف
زينب البصري
ليست هناك تعليقات:
إرسال تعليق