عشان غلبان
(ابراهيم تيكو تيكو )
إبراهيم عرفان
عشان غلبان
ماحضرش جنازته
فلان وفلان
وفلان وفلان
حتى انا كنت كمان كسلان
وصاحبنا اللى نافش ريشه
بعيونه شايفه مش إنسان
عشان غلبان
***
عشان غلبان
الله يرحمه
هوه كريم حنان
كان طيب وكان
له ضحكه تطرد الأحزان
لا كان حرامى
ولا وارث ٢٠٠ فدان
طول عمره عاش شقيان
وكل يوم فى مكان
على راسه يشيل اللِب والترمس
مرة فى ميت تمامة
ومرة فى دكرنس
فى اللؤمه الحلال عشمان
الحمد لله الرحمن
على انه بيفضلنا
بالتقوى والإيمان
مش بالمناصب
ولا بالحسب والنسب
ولا الأطيان
عشان غلبان
***
عشان غلبان
كانت جنازته
ع الأد محدوده
واللى حضرها ناس
ع اليد معدوده
على إيه متكبرين
وعُقولكو مسدوده
ليه تجهلو المساكين
قلوبكو ليه سوده
دالكل فى القبر
هتنخوره الدوده
كل من عليها فان
مافيش فرق
الغنى زى اللى عاشها جعان
عشان غلبان
***
عشان غلبان
كان العزاء قاصر
لا فيه فِراشه
ولا صوان على فدان
ولا ده ماشى بطقم الشاى
ولا ده ماشى بالفنجان
ولاده قاعد فى بُقه سيجارة
وقارفنا بالدخان
ولا قارئ بصوته يلعلع
بيبيع بالربع فى القرآن
ولا واحد يهز الراس
متسلطن ومش فهمان
ولا واحد حاضر نعسان
ولا كرسى أطيفة فخم
حجزينه لابو قردان
الناس مقامات ياعم
ولكل لطخ مكان
عشان غلبان
***
عشان غلبان
آاااااااااااااااااااااااه
آه يابشر
ياتراب فوق التراب ماشى
الكل فانى
والدنيا ماتسواشى
على إيه متكبرين
دالكِبر من الشيطان
هوه الفقير من طين
وانتو من المرجان
إن أكرمكم عند الله أتقاكم
إفهمها يا غفلان
دانتامخدوع ومش دريان
فى القبر كله هيتظلت
ويدوب فى التراب دوبان
معلش ياعم ابراهيم
الدنيا ملانه عبط
الناس فاهمنها صح
وانتا اللى فاهم غلط
الناس حاسبنها غنى وفقير
وزير وغفير
ضعيف وكبير
والعدل فيها إتشفط
وماعدش فيها حنان
الله يرحمك
ويزيدك من الإحسان
ويسكنك فى النعيم
ويبعدك عن النيران
وماتزعلش من الزمانده
الدنيا مطنشه الغلبان
عشان غلباااااااااااااااان
رثاء
شاعر الإحساس
رضاعبدالحميد
ليست هناك تعليقات:
إرسال تعليق