قصيدة شعبية بعنوان {{ لاتحْلِفي بْأَللّٰه }} بقلم الشاعر السوري القدير الاستاذ {{جمال خضور}}

قطفةشعر.. من (زورق الليل) 

لاتحْلِفي بْأَللّٰه… 

ولاتحْلِفي.. 

بِ مْزَارْ.. 

ولاتْقولي..

 دَروبْ الهوىْ بْعيدة.. 

لابإيْدِكْ ولابإيْدي.. 

ماهُو سَبَقْ.. 

تَ يِخْلَصْ.. 

الْمِشْوارْ.. 

بِعْيونِكْ مْخَبّْا أمانِة.. 

غَيْمةْ شِتي.. 

مْعَلَّقا بْ آدارْ.. 

ياتْشَتّْي فَرَح.. 

ياتْروحْ… 

متلْ غَيْماتْ العَقِيمِة.. 

لادَمعْ  بِعْيونها… 

ولامْطارْ.. 

نِحْنا المَطَرْ … 

لو..تَعْرِفي.. 

شو بَدّْو القَلبْ؟.. 

لَمْعِة بَرقْ..!!.. 

يصيرْالعِمرْ فَرْحانْ.. 

وآهاتْ  الصَّدرْ..

اتْروحْ..مِنّْا.. 

وتخْتفي..

ويبْقىٰ للقَلبْ.. 

نَوَّارْ.. 

كاساتْ.. مْعَتَّقَة.. 

بِجْرارْ.. 

وخوابي الروحْ مليانة.. 

صَدىٰ حْكاياتْ.. 

وغْناني.. 

قْصاقيصْ منْ الورَقْ.. 

مْلَوَّنة.. .

 بأشْعارْ.. 

يالّٰله انْشَتّْي..عشقْ.. 

رْوابينا عطْشانة.. 

تَ يْفَتِّحْ وردْ.. 

والعمرْ.. 

جلْنارْ.. 

دْروبْ الهوىٰ.. 

ماهي سَبَقْ.. 

تَ يخْلَصْ.. 

المشْوارْ… 

       سوريا /جمال خضور