@ على جبينك @
لجل ما في عنيكِ بقيه
من اللي فات
على جبينك بتضوي
صفحة الحب الاخيره
من كتاب الذكريات
لسه ياسمينك ما متش
والولد شايل في قلبه
لجل خاطرك
قصه لسه ما انتهتش
إغسلي بشعرك ظلام الليل
وهاتي الصبح من الاول نعيده
لجل ما القمر اللي ساكن في الخريف
على الشجر يكمل نشيده
لو عرفتي إني بحبك
قد كل الرمل الاصفر
على المواني والصحاري والشطوط
لوعرفتي إني بحبك
قد دقات قلبي
وأنفاسي من يوم ما إتولدت
ولغاية ما أموت
لو عرفتي كنتي وفرتي الليالي
وأفكارنا وإنتظارنا للسنين
كنتي خليتي الليالي
اللي إحنا عشناها
تخلف الف ليله وشمس تانيه
وصبح تاني فوق نهارنا
لجل ما في عنيكي
بقيه من اللي فات
هاتي نياتك وإضحكي
وغني وخلي صوت الضحك
يسرح في الفضا
خلي ضحكتنا تهاجر السكات
اللي إنغرس فوق صدرنا
ماانا أصل حبيتك
وانت في عنيكي الحنين
لجل ما في عنيكي
بقيه من اللي فات
على جبينك بتضوي
صفحة الحب الاخيره
من كتاب الذكريات
على جبينك
د. عاطف سالم نصر
ليست هناك تعليقات:
إرسال تعليق