قصيدة شعبية بعنوان {{لحروف التايهة}} بقلم الشاعر المغربي القدير الأستاذ{{المصطفى نجي وردي}}

..........................لحروف التايهة......       ..

ف الكتبة..

نلاقي حرف مع حرف

وبجنب الواد

نتقصى الطرف الطرف..

نزيد ف الاول نغمة

وننقص من الثاني طرف

نلاقي حروفي ب دمعة

تنزل سخونة..

تمسحها دمعة ودمعة..

وبين الدمعة والدمعة

تخرج لحروف حزينة

وب الخف...

نشعل ليها ضو

مغاشي..

ومرات نشعل ف جوفي شمعة

ونار تحرقني تحت الدف...

يا احبابي..!

هاذ الدنيا لعبة

تدينا وتسكنا بالمعروف

وف التالي تشدنا عليها

ميات اغبينة

واشحال من الخوف...

نخيطو الصهد بالصهد

ونرقعو البعد ف البعد

واجنابنا ضاربها البرد...

يا خوتي..!

..اسكني هاذ الحرف

وف العمق اهلك لي الجوف..

ف بلادي ما لقيت رحمة

وف بلاد الناس

قايسني الخوف..

هربان نقلب ع لخبزة

وبلادي قلبي عليها ملهوف...

لاش يا خدام...

ازرعتو الرهبة

ونهبتو الرحبة

والناس بعينيها

تبرقق وتشوف...؟!

هاذ الزمان..!

زمان الخطبة والزربة 

واحنا جاريين غ ع المصروف..

واش هاذا قانون ولا حكمة..

حتى لغدا..

تلقى كلشي محسوب

ومصفوف

اومخلوف...

       المصطفى نجي وردي(بقلمي)18\3\2020

                    المغرب