-------------- يا قلم. ! --------------
يا قلم...
يا قلم اشبيك
مني هارب
وما عاد عندك
في المحبة قول
زعمة القلوب
ضيعت لمسارب
والا المشاعر
ماشية وتزول؟
.................................
أشبيك
يا قلم تتهرب
وأنت الرفيق
ومن عز المحابر تشرب
وفي العشق
عندك خبرتك ومجرب
واليوم تتهرب
وللقوافي ما لقيت حلول
سنين مرافقني
في الغرام وتكتب
وتوزن كلامك
وتعدل معايا القول
.............................
زعمة العمر غدرنا
وضاعت علينا
سنينا وكبرنا
وياما...
وياما سهرنا الليل
وتحيرنا
الراس شاب
وما عاد لينا قبول
وسط جيل مغتر
ما عبرنا
واسباب كثيرة
الشرح ليها يطول
................................
زعمة متحير كيفي
وانت خابرني
صعيب في توليفي
وكثير المراكب
تعرف مجاديفي
وتعرفني
ما نبني أحلام في المجهول
وديمة سلاحي
الكفن وسيفي
والجيب عامر
لعل السفر يطول
................................
يا قلم
ليش مني هارب
وما عاد عندك
في المحبة قول
زعمة القلوب
ضيعت المسارب
وإلا المشاعر
ماشية وتزول
الهادي عباس- تونس
ليست هناك تعليقات:
إرسال تعليق