##المكالمة_3##
الوووو .
ازي حالك
ساكتة ليه ايه بس مالك
انتي مش عايزة تقوليلي
تفسريلي
ليه واقف ف حلقك الكلام
،،،
مخنوقة شوية
وقلبي مقبوض حبتين
،،
أكيد دلع ولا ناوية ع الملام
،،،
كنت عايزة منك حبة اهتمام
تمسك ف قلبي مش تسيبه
تعفقه من نن روحه
حد العذاب
،،
وهل يعذب الحبيب حبيبه؟
ف اي دين واي كتاب
،،،،
عذاب قربك ولا جنة
وانت بعيد
ولا البعيد لسه مش فاهم
يعني ايه احباب
،،
صدقيني لو اللي بيننا يبقي باب
كنت دقيت بالكفوف
كنت شقيت الف خوف
كنت ماشربتش لحاجة
هتوديني للغياب
كنت صمت عن المواجع
وامتنعت عن الالم
وما فطرتش عذاب
مين بإيده يرمي روحه جوا
احضان الندم
يحضنه يكسر ضلوعه
والله يجازي مين ظلم
انا يابنت الناس
زي كل الناس
عايش ف غيبوبه
ماشي في الحياة فهلوة
والاسم سبوبة
ماعادش يفرق معانا الموت
او مين يموت
ماحياتنا معطوبة
الجدعنه صبحت بلطجة
وفتحة صدر معيوبة
لا بقينا نخاف ولا نختشي
مادام العركة منصوبة
،،،،
ليه بتغير مبادئك
ماكانش دا هو طبعك
مش انت اللي انا عرفتك
،،
الووو ،
صدقيني غصب عني
هعمل ايه لما اشوف كل
حلم فيا بيتقتل
لما اشوف زهرة شبابي
بين ايديا بتتسحل
بدون مقابل
بدون معين
في دنيا بتنجح الفاشل
وتفشل الناجحين
،،،
الووو ،
ممكن تقفل ونتكلم بعدين
محتاجة اتنفس هوا
واقعد مع نفسي شويتين
سلام ..
✍️#محمد_فتحي_الشيمي
ليست هناك تعليقات:
إرسال تعليق