قصيدة شعبية تحت عنوان{{مَاتّرحليش}} بقلم الشاعر المصري القدير الأستاذ{{محمد_فتحي_الشيمي}}

 

####مَاتّرحليش####

         ********

ماترحليش ،،

اوعي تمشي مترحليش

ليا مين غيرك ف بُعدك

لا مفيش 

عايزة شمس الدنيا ترحل

ويّا طيفك

والعبير اللي ف زهوري

يكون وليفك

والقمر يغضب عليا

 وما يجنيش ،

طب قوليلي ازاي هعيش

ماترحليش ..

الصور زعلانة مني واللعب

فوق الرفوف

كل ركن فيه ماضينا شابعني

ضرب بالكفوف

شوفت خوف مالي كياني

من كتر خوفه ماشفت خوف

والدنيا ايه من غير هوانا

متساويش ..

ماترحليش ..

مين هيستحملني غيرك

لما اكركب كل شئ

ومين هيجاوبني ف سؤالي

من غير ماالاخلاق تضيق

عن نضارتي وعن سجايري

وعن حاجاتي اللي تاهت

وهي كانت بين ايديا 

من مفيش ..

متلاقيش .. 

ماترحليش ..

سَّرة كل شعور سِكنا من ساعة 

ماكان لقانا

واخدة حروف قصايدي ليكي

والقلم سكران ف حانة

دمه ناشف من فراقك

وحالف انه لن يعيش

 الآاااا .. درويش ..

ماترحليش ،،

واخدة معاكي نور عينيا

واخدة ليلي والسهر

واخدة كل حاجة حلوة

وفايتالي بس الأثر

تجلد ف اللي باقي مني

مبتداي والخبر

ان الحياة بدونك انتي

نار ف هيش ..

 فماترحليش ..

✍️#محمد_فتحي_الشيمي