###حارة_الغدر###
واقف علي لساني
طراطيف الكلام
خايف م الكلمة تجرح
هدوء السلام
وسط دهاليز الزمن
فوق رفوف الذكريات
حكاية كانت بتبكي
بين كم حكايات
تراب كتير جوا النفّس
مالي الورق بالتضحيات
جدار قديم محتاج يُقام
راحت ف عينه التلوينات
فياللي ساكنلي بحور الضل
عمر الضل ماييجي ويقل
موجه تغمي عينيك ما تشوف
وموجه تخنق فيك وتغل
عمر العهد ماكان من خاين
ولا فيه ديّن يسقط من داين
اوعي تصدق مرة كلامهم
ولا بجسور وبيوت ومداين
هيطربقها عليك فوق راسك
مش راح يرحم منك ناسك
قاضي الحق ودايما طالب
وما تزعلش ف يوم لو داسك
ما انت البايع وانت الضايع
وانت التايه جوا حماسك
اوعي تصدق ضحكة سِنُه
لو جه وطي علي ايدك باسك
تعبان سمه زعاف مدفون
جوا الشهد يجيك خناسك
شايل الشيلة بطول العمر
يا غزاوي ما ف يوم كليت
خزوك الاهل والعيلة
ماجيتش وتهت ولا ضليت
عارف سكتك ماضي
بتزرع نور ف ارض الزور
كل ما حولك اتخلوا
واقرب ماليك اهو قالك غور
ما تتعبناش بكلاكيعك
ما بعت الارض والجمهور
لا عمرك بعت
بس اتسرعت
قلت اخوات وجنة وحور
سليم النية ايا صاحبي
ف حارة الغدر وجاي تحبي
لا تقول اسلام ولا عروبة
دموعهم خاضعة بتخبي
نيرانهم قايدة لكن مش ليك
كلامهم ليك لّكْ وتلاكيك
بترولهم نعمة لعدوك
تمد الايد منين نديك
قضية بجد خسرانة
مادام القاضي بيماطل
ف خمارة بايع نفسه
وسايب الاقصي بيناضل
وحيد الخطو منفرداً
وانت ماراضي تتنازل
رجاءً اوعي تتنازل
وبكره وعد م الديان
هيفنيهم جدار عازل
✍️ #محمد_فتحي_الشيمي
ليست هناك تعليقات:
إرسال تعليق