رمضان زمان
رمضان زمان كان ليه معنى
كان لمه حلوة بتجمعنا
صحبه وجيرة وحاجات كتيرة
ومسحراتى يسمعنا
طبله وغنوة وكلمه حلوة
انده وقول كده فى شارعنا
والفجر يدن تلاقينا
خارجين بسجادة فى ايدينا
والمسجد مليان على أخره
ومافيش مكان فيه يتاخره
نصلى ونروح سوا نلعب
مانبطل الا اما نتعب
واليوم يعدى بقى ويجرى
وفى ناس بتصحى ومن بدرى
تبدأ تحضر فى فطارها
وناس بتنزل تتسوق
وتجيب حاجتها وخضارها
قبل الفطار كده فى لمه
هيصه ودوشه كمان زحمه
مستنى المغرب يدن
عشان انا عطشان جدا
واما الاذان يبدأ يدن
الناس بتبقى سعيدة جدا
وفى ثانيه الشارع يفضى
ندخل بيوتنا ونتوضى
ونصلى وبرنجع نفطر
وبنحمد ربنا وبنشكر
على احلى لمه تنسينا
همومنا اللى موجوده فينا
وحشانى ايام رمضان
اللى كانت حلوة زمان
اللى ماتتنسى لو مره
وبحبها حتى لو مره
علشان دى حته من عمرى
ايام طفولتى كده وصغرى
والله عمرى مانسيتها
وفى كل مجلس انا حكتها
بتمنى لو ترجع ثانيه
اجمل واحلى مافى الدنيا
رمضان زمان كان له معنى
كان لمه حلوة بتجمعنا
كلماتى محمد تريكه تريكه
ليست هناك تعليقات:
إرسال تعليق