{ تعا متل راجح }
خاطرة مكتوبة باللهجة المحكية
~~~~~~~~~~~~~~~~~~~
أنتظرتك دهر
وقبل مـا يدوب خيط العمر
تجي مع وج الفجر
تجي من عطر الزهر
من خدود القمر
من قرص الشمس
تسافر مع النسمات
شوفك بلمعة النجمات
بسمة فرح
على صدري لمِّها
ضمِّها بشفافي وشمِّها
بعد جرح الزمن
بعد سنين القهر
...2
أنتظرتك شوفك عـ الورق
قبل ما تدوب حروفي وتحترق
أطل من بين حروف الشعر
غيمة مطر
أكتبك دمعات
أكتبك نهدات
تسافر بعيوني
بعد ما تلملم الكلمات
ويرتاح السفر
...3
أنتظرتك شوفك في الحلم
بـ ليلة تلج
قبل ما ينطفي ويسكر سراجي
ويرقص آخر الرقصات
وتعتّم براجي
ويغفى الحلم عـ دراجي
تجي من خلف الشمس
من خلف صخور الجرد
حامل غمار من الورد
ومن خبايا المحبي كنوز
تجي مع صوت فيروز
من الغنيات
تجي آهاااااااات
تسكن بقلبي نغمات
من حكايات المسارح
من بياع الخواتم
متل راجح
يشق صوتك الضباب
تجي خيوط من السراب
من ورا لـ جبال
من خلف لـ تلال
هربان من البردات
حامل خواتم العرس
غازل أساور من الشمس
وكلَّك مطر
ادق على بوابي
متل دقات الشتي
تسمعك لـ خوابي
وتفيق قناني الخمر
وتعرق من دقتك الكاسات
وتفتحلك عيوني
تركض إلك
وتغمرك جفوني
تقلك
أنا كلي إلك
خدني إلك
ويهرب من شفافي الحكي
يدوب البكي
ويخرس العتب
قطّف من شفافك حبات العنب
ونقعد حد الموقدي
نولِّع حطب
ونحرق سنين العذاب
وغطيك بلحافي
واسرق منك النظرات
وأنت ...
نايم عـ صدري وغافي
إيدك مـ تفارق كتافي
وتقطف لوعة شفافي
من شفافك
جوع النطرات
وجمرات من اللهب
علاء الغريب / كاتب صحفي
ليست هناك تعليقات:
إرسال تعليق