دايبه في دباديبك
بقلم/عماد الأبنودي
•••••••••••••••
مابين الإعجاب و الدهشة
بأتنح وانا بصالك
يخربيت دا الهوى
جابني بلهفة لديارك
فاكرني دايبه ف دباديبك
و الشوق واقع في غرامك
منفوخ ع إيه يا حيلتها
و فاكر أمك داعيك
دا أنا عملك المنيل
اللي مايخطرش ع بالك
عوز تقرب متقرب
و سمعني يالا أقوالك
بتحب و تلاغي بقلبي
ولا بتبرر أعذارك
العشق ماهوش بالعافيه
و تجني عليا بقرارك
وتقولي مالناش غير بعض
وإنت مكمل مشوارك
و كلام الليل مدهون زبده
يسيح من شمس مرارك
بقا قلبي مذنب دلوقتي
ومعيشني تملي بصراعك
ملعون الحب اللي يشتاقلك
لو خبط مرة ع بابك
علق له منشقة إعدام
و خليك القاضي جنابك
موهوم اللي يفكر فيك
أو يسرح لحظة لخيالك
إنت آخرك رصاصة حية
تفتت بالقسوة أوصالك
و إبقى قابلني لو قلبك حن
و رجعت تاني ف قرارك
لو لمست السما أقربك
إنك تقربلي حتي فأوهامك
،، بقلم ،،
عمااد الأبنودي
2 , 6 , 2024
ليست هناك تعليقات:
إرسال تعليق