ما تكونوش علينا حڨود
ماناشي رڨود
و لا نروغو بتراث جدود
مهما نزل الرّوم ***** و حكمت فينا روامة
يبغوا تراثنا مردوم ***** في هفهوف تهزّه دوّامة
و بغاوه يكون معدوم **** و نعيشوا بفكرهم و ظلامه
ڨالوا شنّو كليم و مرڨوم **** و شنّو السفساري و حزامه
و صنعوا اللباس المشروم**** و زادوا طبعوا فيه علامة
ڨالوا يا عربي يا محروم **** تمتّع بزمانك و غرامه
و شيّع عيونك للنجوم **** و ألحڨ النّاس النجّامة
و موش البارح كيف اليوم **** و كل عصر يطيع أيّامه
ڨلت حتّى لو ڨدرت نعوم **** و سبڨت النّاس العوّامة
عمري ما نكون محكوم **** و لا نطيع الغربي و أحكامه
تراثي غالي السّوم **** و ديما يصعب ع السوّامة
بالبلغة و بالجبّة مغروم **** و كبّوسي معنڨر بضخامة
بغيتوني نتبّع و نروم **** و نبصم بصمة بالسفّود
يبڨوا ناسي خيار الڨوم **** بشهامة و كرم و جود
و ما تكونوش علينا حڨود
تراثي أصله م العادة **** موروث من عند جدادي
دابغ في جاشي و إفّاده **** نغرسه في ضمير أولادي
نفخر بأصلي و أجداده **** من عرب أولاد البّادي
نفرح بديني و أعياده **** و نحمد السّبحان الهادي
مسلم ننطڨ بشهادة **** مفروضة في صلاتي و رڨادي
خبزة الملّة الصهّادة **** ملزومة زادي و زوّادي
و الجرّارة بحبلها معتادة **** و الدّلو الطّالع و الغادي
و الشكوة لمعلڨة برفادة **** حبلى باللبن و زبّادي
و ناري الشّاعلة الوڨادة**** وجمرها مرفّد برّادي
في نوادر ڨمحي و حصاده****الجاروشة دريستي وحصادي
مڨروني و ڨرصت زناده**** بالوجهين ماهو فرّادي
غزّي من أهل الصيّادة**** صبعي ما يفارڨشي زنادي
يرحم من خلّا هالعادة****و زاد رشمها فوڨ جلود
و لزّمها مثيل ڨلادة **** و كل ماهو متسلّف مردود
و ما تكونوش علينا حڨود
نوصّيك بلادك تحماها**** و تفخر بتراثك تحميه
في أعلى قمّة تعلّاها ****ترفع راسك لا توطّيه
مثيل عروسة و تجلّاها **** و ڨدرها للدنيا تورّيه
بنت بلادك يا مبهاها**** بالقرداش الصّوف تصفّيه
و مغزل محاذي رجلاها**** الصّوف كبب تكبّب فيه
و السدّاية صوفها يحلّاها**** و نسّاجها مفروض نبيه
الحرّة الزاورة تغطّاها **** و ظهري البرنوس يدفّيه
الشاشية ليها إمّالاها**** و الكبّوس ليه إمّاليه
الحرّة الإبرة تواتاها**** والڨرڨاف تطرز بيه
غرزة بغرزة إتبّع فاها**** لحافها بالغالي نشريه
الغالية بلادي نسمّاها**** مدامني فيها موجود
وملزوم عليّا ما نخلّاها **** بجاهك يا عالي المعبود
و ما تكونوش علينا حڨود
عربي و عايش بالعز**** ونزيد ع العز عزازة
عمري ما نرضخ لللّز**** ولا نطيح لحكم اللزّاز
سيدي معاوية بان برز**** يضوي بفنارة و ڨازة
و بسيدي محرز نعتز **** نحميله برّه و حوازه
و لللّة المنوّبيّة نهز **** ذبايح بالتهليل و زازة
و للسيدي عبد السلام نفز**** بنادر في الحضرة هزازة
تقاليدي نڨدها و ننجز**** بشهايد واخذ إجازة
خيّاط ڨتّال غرز **** ما نتبّع كان الطرّازة
عوّام ولد الوز **** من ڨاع الغريڨ إجتازه
صڨر العرب و ركز **** عمره ما يرضخ للبيّازة
لا جاع تذل تلز **** لا حكمت فيه الخبّازة
و لا وطّى راسه عجز **** ولا نتّف ريشه بڨزازة
نا طير الحر نفرز **** و ديما يصعب عالياهود
و لا نركد مثيل الخز **** راخي أكتافي مهدود
و ما تكونوش علينا حڨود ** ماناشي رڨود*و لا نروغوا بتراث جدود
بقلم حاتم بن حورية
في 2024/08/01
ليست هناك تعليقات:
إرسال تعليق